دیالە ؛ دەروازەی سنوری مەندەلی داخرا

10.08.2019

لڤین:

سکرتێری تایبەتی فەرماندەی گشتیی هێزە چەکدارەکانی عێراق ، بە بڕیاری سەرۆک وەزیرانی عێراق دەروازەی سنوریی مەندەلی لە سنوری پارێزگای دیالە، که هاوسنورە لەگەڵ ئێران، داخرا.

بە پێی بەڵگەنامەیەک کە وێنەیەکی دەست ( لڤین ) کەوتووە و واژۆی محەمەد حەمید کازم سکرتێری تایبەتی فەرماندەی گشتیی هێزە چەکدارەکانی عێراقی لەسەرە و رۆژی ٧ی ئاب دەرچووە و بە شێوەی نهێنی ئاڕاستەی دەستەی دەروازە سنوورییەکان کراوە، هاتووە " پاڵپشت بە فەرمانی ژمارە( ٢٣٨٨ ) لە رۆژی(  ٣١ / ٧ / ٢٠١٩ ) رەزامەندی سەرۆکی ئەنجومەنی وەزیران و تایبەتی فەرماندەی گشتیی هێزە چەکدارەکان لەسەر داخستنی دەروازەی سنوریی مەندلی وەرگیراوە".

لە بەشێکی تری بڕیارەکەدا ئەوەش هاتووە " سەرجەم فەرمانبەرانی دەروازەی سنوریی مەندەلی بۆ دەروازەی سنوریی مونزەریە دەگوازرێنەوە ".

لە نوسراوەکەدا هیچ هۆکارێک بۆ داخستنی مەرزەکە نەخراوەتەڕوو، بەڵام چەند سەرچاوەیەکی عێراقی ئاماژەیان بەوەکردووە کە داخستنی مەرزەکە پەیوەندی هەیە بە هەژموونی میلیشیاکان بەسەر خاڵە سنورییەکەدا.

هەروەها سەرچاوە عێراقیەکان ، ئاماژەیان بەوەشکردوە " میلیشیاکان خاڵە سنورییەکە بۆ هاوردەکردنی کەرەستەی رێگەپێنەدرا و و نایاسایی بەکاردەهێنن".

ئەوەش لەکاتێکدایە، بەگوێرەی زانیارییەکان دەروازەی سنوریی مەندەلی بە دەروازەیەكی گرنگی هەناردەكردنی چەكی ئێران بۆ هێزەکانی حەشدی شەعبی لە عێراق و هێزە هاوپەیمانەکانی تاران لە سوریا و لوبنان دادەنرێت، مانگی ڕابردووش ئیسرائیل كۆگای موشەكە بالستییە ئێرانییەكانی لە سەربازگەی "شوهەدائی مەندەلی" لە نزیك ئەو خاڵە سنورییە بۆردومان كرد.

 

310 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations