تەنها لە مانگی تەمووزدا ١٩٧ملیار تۆن سەهۆڵ تواوەتەوە

03.08.2019

لڤین: 
تواندنەوەی سەهۆڵ لە بەستەڵەكەكان بە ڕێژەیەكی بەرچاچو زیادی كردووە كە بەراورد بە ساڵانی رابردوو چەندین جارە زیادی كردووە. 

پەیمانگاكانی توێژینەوەی جەمسەرەكان لە دانیمارك لە راگەیەنراوێكدا ئاشكرای كردووە، تەنها رۆژی 31ی تەمووز لە گرۆنلاند بڕی ١٠ ملیار تۆن سەهۆڵ تواوەتەوە و لە مانگی تەمووزیشدا بەگشتی بڕی ١٩٧ملیار تۆن سەهۆڵ تواوەتەوە كە دەكاتە هێندەی ٨٠ ملیۆن مەلەوانگەی ئۆڵۆمپی.

ناوەندی هەواڵی سی ئێن ئێن بڵاوی كردەوە، روس مۆترام لە پەیمانگای كەشناسیی دانیمارك رایگەیاند، ماوەی چوار مانگە بەهۆی بەرزبوونەوەی پلەكانی گەرماوە سەهۆڵی گرۆنلاند بەخێرایی لەتوانەوەدایە.

ناوبراو رایگەیاندووە لانی كەم چەند رۆژێكی دیكەش كەشوهەوای ئێستای گرۆنلاند بەم شێوەیە بەردەوام دەبێت.

پێشتریش توێژینەوەیەكی زانایانی زانكۆی ئۆهایۆ لە مانگی كانوونی دووەمی ئەمساڵدا بڵاو كرایەوە، توانەوەی سەهۆڵی گرۆنلاند لەساڵی ٢٠٠٣ بۆ ٢٠١٣ بەرێژەیەكی بەرچاو زیادی كردووە و توانەوەی سەهۆڵ لە ٢٠١٣دا چوار هێندەی ٢٠٠٣ بووە.

398 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations