سەرۆكایەتی هەرێم ناوەڕۆکی کۆبوونەوەی سەرۆکی هەرێم و سەرۆک کۆماری ئاشکرا کرد

لڤین:

لە ڕاگەیەنراوێكدا، سەرۆكایەتی هەرێمی كوردستان، ڕایگەیاندووە، ” پاشنیوەڕۆی ئەمڕۆ پێنجشەممە ٢٩\٤\٢٠٢١ نێچیرڤان بارزانی پێشوازی لە د.بەرهەم ساڵح سەرۆك كۆماری عیراق كرد”.

لەبەشێکی تری ڕاگەیەندراوەکەدا هاتووە، ”جێگرانی سەرۆكی هەرێمی كوردستان و جێگری سەرۆك وەزیرانی هەرێمی كوردستان ئامادەیبوون، دوا گۆڕانكارییە سیاسییەكانی عیراق و هەرێمی كوردستان تاوتوێ كران، بەتایبەتی هەڵبژاردنی پێشوەختەی ئەنجومەنی نوێنەرانی عیراق و چۆنیەتی زەمینەخۆشكردن لەبەردەم پرۆسەكەدا كە خزمەتی بەرژەوەندیی هاوبەشی گەل و هەموو پێكهاتەكانی عیراق بە هەرێمی كوردستانیشەوە بكات”.

هەروەها هاتوە، ”لە كۆبوونەوەكەدا داكۆكی لە پێویستیی تێپەڕاندنی ناكۆكی و ململانێكان و گفتوگۆ و لێكگەیشتن لەنێوان لایەنە سیاسییەكاندا كرایەوە و بەگرنگییەوە باس لە دوایین سەردانی بەڕێز سەرۆكی هەرێمی كوردستان بۆ بەغدا و كۆبوونەوەی لەگەڵ سەركردە و لایەنە عیراقییەكان كرا”.

سەرۆكایەتی هەرێمی كوردستان، ئاماژەی بەوەداوە، ”لە تەوەرێكی دیكەی كۆبوونەوەكەدا گفتوگۆ دەربارەی هێنانەدی یەكڕیزیی نیشتمانی و لێكنزیككردنەوەی بیروبۆچوونەكان كرا بە ئاراستەی تێپەڕاندنی ناكۆكییەكان و یەكخستنی هێز و تواناكان بۆ ڕووبەڕووبوونەوەی ئەگەر و پێشهاتەكان”.

لە کۆتای ڕاگەیەندراوەکەدا هاتووە، ”تاوتوێكردنی دۆخی ناوچەكە بەگشتی تەوەرێكی دیكەی كۆبوونەوەكە بوو، تیایدا جەخت لەوە كرایەوە كە ناسەقامگیریی دۆخی سیاسی و ئەمنی، خزمەت بە بەرژەوەندیی هاوبەشی گەلانی ناوچەكە ناكات”.