مەسعود بارزانی و بەرهەم ساڵح لە پیرمام لە کۆبوونەوەدان

لڤین:

مەسعود بارزانی، سەرۆكی پارتی دیموكراتی كوردستان و بەرهەم ساڵح، سەرۆك كۆماری عێراق لە پیرمام لە كۆبونەوەدان.

دوای ئەوەی دوێنێ بە سەردانێک گەیشتە شاری هەولێر، لە ئێستادا بەرهەم ساڵح، سەرۆك كۆماری عێراق لە پیرمام لەگەڵ مەسعود بارزانی، سەرۆكی پارتی دیموكراتی كوردستان، لە کۆبوونەوەدایە، بڕیارە دوای ئەو کۆبوونەوەیەش بەرهەم ساڵح، لەگەڵ مەسرور بارزانی، سەرۆکی حکومەتی هەرێمی کوردستان کۆبێتەوە و و بڕیاریشە دواتر لەگەڵ سەرکردەی لایەنە سیاسییەکان کۆببێتەوە.

دوێنێ لەکاتی گەیشتنی بە فڕۆکەخانەی نێودەوڵەتی هەولێر، بەرهەم ساڵح، سەرۆك كۆماری عێراق، لە لایەن نێچیرڤان بارزانی، سەرۆکی هەرێمی کوردستان پێشوازیی لێکرا، بەڵام بە گوێرەی زانیارییەکان بڕیارە ئەمڕۆ بەشێوەی فەرمیش لەگەڵ نێچیرڤان بارزانی، سەرۆکی هەرێمی کوردستان کۆببێتەوە.

پێشتر ڕاگەیەندرابوو کە بەرهەم ساڵح، ئامانجی سەردانەکەی بۆ گفتوگۆکردن بووە لە بارەی هەڵبژاردنی داهاتووی عێراق جگە لەوەش هاوكات بڕیارە بەرهەم ساڵح لە سەردانەكەیدا هەوڵێكی نوێی بۆ یەكخستنی گوتاری لایەنەكانی هەرێمی كوردستان لە عێراق و ناوچەكە لەگەڵ بەرپرسانی هەرێم تاوتوێ بكات، بەمەبەستی ڕووبەڕووبوونەوەی ئاستەنگەكانی ناوچەكە.