بەرهەم ساڵح و جێگری سەرۆکی حکومەتی روسیا کۆبوونەوە

لڤین:

جێگری سەرۆکی حکومەتی روسیا و بەرهەم ساڵح، سەرۆک کۆماری عێراق لە بەغدا کۆبوونەوە و سەبارەت بە گۆرانکاری و پێشھاتەکانی ناوچەکە گفتوگۆیان کرد.

ئەمڕۆ د. بەرهەم ساڵح، سەرۆک کۆماری عێراق، لە کۆشکی بەغداد پێشوازیکرد لە یوری بۆریسۆڤ، جێگری سەرۆکی حکومەتی روسیا و سەرۆکی لیژنەی ھاوبەشی عێراق – روسیا و پێکەوە کۆبوونەوە.

بەپێی راگەیەندراوی سەرۆکایەتی کۆماری عێراق، لە کۆبوونەوەکەدا “بەگرنگییەوە باس لە پەیوەندییەکانی نێوان هەردوو وڵاتی دۆست و چۆنیەتی پەرەپێدانی لە سەرجەم بوارەکاندا کرا، ھەروەھا جەختکرایەوە لە گرنگی بەهێزکردنی ھەماھەنگی لە بوارەکانی ئاسایش و بەرگری بۆ رووبەڕووبوونەوەی تیرۆر و هاریکاری بازرگانی و ئابووری و رۆشنبیری، بەجۆرێک خزمەت بە بەرژەوەندی هاوبەشی هەردوو گەلی دۆست بکات”.

هاوکات گفتوگۆشکرا دەربارەی کارەکانی لیژنەی هاوبەشی عێراق – روسیا و پێویستی فراوانکردنی هەماهەنگی بۆ سەرخستنی بڕیارەکانی لیژنەی ھاوبەش لە رێگەی چاودێریکردنی ریککەوتننامەکان و واژووکردنی.

لە بەشێکی دیکەی کۆبوونەوەکە بەرهەم ساڵح ڕایگەیاند “ناوچەکە رووبەڕووی کێشە و ئاڵنگاری زۆر بووەتەوە، بۆیە پێویستە ھەماھەنگی و کاری جددی بکرێت بۆ تێپەڕاندنی ناکۆکییەکان و کەمکردنەوەی گرژییەکان لە رێگەی دیالۆگەوە”.

هاوکات ئاماژشیکرد بە کرانەوەی عێراق بە رووی ناوچەکەدا بە ئامانجی بەهێزکردنی ئاسایش و ئارامی ناوچەکە، ھەروەھا جەختیشیکردەوە ئاسایش و سەقامگیری و سەروەری عێراق بەشێکی گرنگە لە چەسپاندنی ئاسایش و ئاشتی ناوچەکە، ھەروەک پێودانگێکی گرنگیشە رووەو بەهێزکردنی هاریکاری ئابووری و بازرگانی و پشتیوانیکردن لە دەرفەتی گەشەپێدان لە ناوچەکەدا.

لەلای خۆیەوە یوری بۆریسۆڤ، پشتیوانی وڵاتەکەی بۆ سەقامگیری و سەروەری عێراق و هەوڵەکانی بۆ ریشەکێشکردنی تیرۆر و چەسپاندنی ئاسایش دووپاتکردەوە، هەروەها هەنگاوەکانی روسیای بۆ بەهێزکردنی پەیوەندییە دووقۆڵییەکانی نێوان هەردوو وڵات لە تەواوی بوارەکان خستەروو.