لەڕێگەی ئۆنلاینەوە مەزڵوم كۆبانێ له‌گه‌ڵ وەزیری بەرگریی سوید كۆبویه‌وه
لڤین:
ئەمڕۆ سێشەممە ئاژانسی هاوار لە ڕۆژئاوای کوردستان بڵاویکردووەتەوە، لە ڕێگەی ئۆنلاینەوە مەزڵوم عەبدی، فەرماندەی گشتی هێزەکانی سوریای دیموکرات و پیتەر هۆلت کڤیست، وەزیری بەرگریی سوید کۆبوونەوە و چەند پرسێکیان پەیوەست بە ڕۆژئاوا تاوتوێکرد.
ئاژانسەکە ئامەژەی بەوە داوە لە کۆبوونەوەکەدا ، بەردەوامی هێرشی چەکدارانی داعش و کاریگەرییەکانی لەسەر ناوچەکە و جیهان، کێشەی کامپەکان، سەرلەنوێ بوژاندنەوەی ناوچەکە و هاوکارییەکان بۆ هەسەدە و خۆبەڕێوبەریی باکوور و ڕۆژهەڵاتی سوریا، تاوتوو کراون.
هەروەها وەزیری بەرگریی سوید، لە کۆبوونەوەکەدا ڕایگەیاندووە، پێویستە هاوپەیمانی نێودەوڵەتیی کار بکات بۆ بەدەستخستی ئەنجامی باشتر و نوێکردنەوە و بیناسازیی و فەراهەمکردنی ژیانێکی ئارام لە هەرێمەکە، چونکە هاوپەیمانی دەتوانێت بەشێوەیەکی کاریگەر ببێتە هاوکار بۆ لەناوبردنی یەکجارەکی داعش.
لەبەشێکی کۆبوونەوەکەدا مەزڵوم عەبدی، فەرماندەی گشتیی هەسەدە گفتوگۆکەی بە گرنگ و بەرهەمدار پێناسەکردووە و ڕایگەیاندووە، حکومەتی سوید پشتیوانیی خۆی بۆ چارەسەری ئاڵۆزییەکان لە باکوور و ڕۆژهەڵاتی سوریا نیشانداوە، هەردوولا پەیوەندیەکانمان لە بواری ئاسایش و تێکۆشانی دژە تیرۆردا بەرفراوانتر دەکەین.
لە کۆتایدا مەزڵوم عەبدی ئاماژەی بە ئۆپەراسیۆنی ئاسایش و مرۆیی کامپی هۆڵ کردووە و داوای لە وڵاتانی جیهانیش کردووە، کە هەر هاوڵاتیەکیان لەکامپەکاندا هەیە وەریانبگرنەوە.
