حکومەتی هەرێم دڵنیای دەدات لە جێبەجیکردنی پابەندە داراییەکانی لە بوودجەی عێراق

لڤین:

لە ڕاگەیەندراوێکدا لە پەڕەی تایبەتی خۆی لە تۆڕی کۆمەڵایەتی فەیس بووک فەرمانگەی میدیا و زانیاری حکومەتی هەرێمی کوردستان ڕایگەیاندووە حکومەتی هەرێمی کوردستان پابەندە داراییەکانی لە چوارچێوەی یاسای بوودجەی فیدراڵی عێراق جێبەجێ دەکات.

لە بەشێکی تری ڕاگەیەندراوەکەدا هاتووە وەزارەتی دارایی و ئابووریی حکومەتی هەرێمی کوردستان رۆژی ٢٠٢١/٤/١٣ لە نووسراوێکدا بۆ وەزارەتی دارایی حکومەتی عێراقی فیدراڵ، رەزامەندیی خۆی بۆ جێبەجێکردنی پابەندە داراییەکانی لە چوارچێوەی یاسای بوودجەی گشتی عێراق بۆ ساڵی ٢٠٢١ و گرتنەبەری هەنگاوی کردەیی بۆ ئەم مەبەستە دەربڕیوە.

جێگەی ئاماژە پێدانە به‌پێى پرۆژه‌ یاساى بودجه‌، هه‌رێمى كوردستان پێویسته‌ رۆژانه‌ داهاتى ٢٥٠ هه‌زار به‌رمیل و نیوه‌ى داهاته‌ فیدراڵیه‌كان راده‌ستى به‌غدا بكات و له‌به‌رامبه‌ردا پشكى خۆى له‌ بودجه‌ وه‌رده‌گرێت.

ئەمڕۆ وەزارەتی دارایی عێراق بودجەی ٢٠٢١ی بڵاوكردەوە و پێی یاساكە، پشكی هەرێمی كوردستان لە ٨ تریلیۆن و ١٦١ ملیار دینار بۆ خەرجی، ٣ تریلیۆن و ٢٧١ ملیار دینار بۆ وەبەرهێنان و ٩٢٣ ملیار و ٤٣٤ ملیۆن دیناریش وەكو خەرجی حاكیمە دانراوە.

حكومەتی هەرێمی كوردستان، مانگانە بەبێ لێبڕین پێویستی بە ٨٩٥ ملیار دینارە، لە ساڵێكدا ١٠ تریلیۆن و ٧٤٠ ملیار دینار تەنیا بۆ موچە پێویستە.

 

 

بابەتی پەیوەندیدار

Back to top button