ئەمریکا 24 بارهەڵگری دیکەی سەربازی رەوانەی رۆژئاوای کوردستان کرد
لڤین:
ئەمریکا کاروانێکی دیکەی سەربازی ناردووەتە شاری حەسەکە لە رۆژئاوای کوردستان کە لە چەک و ئۆتۆمبێلی سەربازی پێکهاتووە.
ئاژانسی (سانا)ی فەرمیی حکومەتی سوریا بڵاوی کردەوە، کاروانەکەی ئەمریکا لە 24 بارهەڵگری سەربازی پێکهاتبوو و ئێوارەی رۆژی یەکشەممە لەڕێی دەروازەی سنوریی (یەعروبییە) گەیشتووەتە ناو خاکی سوریا و دواتر گەیەندراوەتە حەسەکە.
ئەوەشی روونکردووەتەوە کاروانە سەربازییەکەی ئەمریکا لە چەک، کەلوپەل و ئۆتۆمبێلی سەربازی پێکهاتبوو و گەیەندراوەتە بنکە سەربازییەکانی ئەمریکا لە ناوچەی شەدادی لە گوندەکانی باشوری حەسەکە.
