کاری لە پێشینەی پەرلەمان ئەوەدەبێت موچە لەکاتی خۆیدا بەتەواوی بدرێت

لڤین:

جێگری سەرۆکی پەرلەمانی کوردستان رایگەیاند، حکومەتی هەرێم بە پەرلەمان و حکومەتی عێراق و راگەیەندکاران و دپلۆماتکارانیشی راگەیاندووە کە پابەندی رێککەوتنی بودجەی پەسەندکراو و مادەی ١٠ و ١١ دەبێت.

هێمن هەورامی جێگری سەرۆکی پەرلەمانی کوردستان لە کۆنفرانسێکی هەواڵیدا رایگەیاند، “ئێمە لەپەرلەمان چاودێری ئەوەین حکومەت چاکسازییەکانی بکات”، دەشڵێت، “کاری لە پێشینەی پەرلەمان ئەوەدەبێت موچە لەکاتی خۆیدا بەتەواوی بدرێت، بە لێبڕینەوە.”

وتیشی “لەم چەند رۆژانەی داهاتوو ٢٠ رۆژ تا مانگێک دەردەکەوێت تا چەندە حکومەتی فیدڕاڵی پابەند دەبێت، بەتایبەتی بۆ ناردنی بەشە بودجەی مانگەکانی ١ و ٢و ٣ و بۆ مانگەکانی ئایندەش.”

راشیگەیاند”مەسروربارزانی سەرۆکی ئەنجومەنی وەزیران و قوباد تاڵەبانی جێگری سەرۆکی ئەنجومەنی وەزیران و شاندی دانوستانکاری هەرێم رایانگەیاند حکومەتی هەرێم پابەندە بە پرۆژە یاسای بودجەی پەسەندکراوی حکومەتی فیدڕاڵی”.

دەشڵێت”بابەتی بودجە پەیوەندی بەهەموو لایەکەوە هەیە و پەیوەست نییە بەوەی کێ براوەیە و کێ دۆڕاوی ئەم بابەتەیە”.

لە ٣١ی مانگی ئازاری ئەمساڵدا، پرۆژەیاسای بودجەی ٢٠٢١ی عێراق لە پەرلەمانی ئەو وڵاتە پەسەندکرا و تیایدا پشکی کوردیش جێگیرکرا، لە ئێستاشدا هاوڵاتیانی هەرێم نیگەرانی ئەوەن، لە دوای ئەو رێککەوتنەوە موچە بە لێبڕینەوە وەردەگرن یاخود نا.