مه‌سعود بارزانی:
هیوا دەخوازین په‌سه‌ندكردنی بودجه دەستپێكێك بێت بۆ بەهێزكردنی بنەماكانی دیالۆگ
لڤین:
مه‌سعود بارزانی، سەرۆکی پارتی دیموکراتی کوردستان، په‌یامێكی بەبۆنەی پەسەندكردنی بودجەی عێراقه‌وه بڵاو كرده‌وه و ڕایگەیاند، هیوا دەخوازین په‌سه‌ندكردنی بودجه دەستپێكێك بێت بۆ بەهێزكردنی بنەماكانی دیالۆگ و پێكەوەژیانی ئاشتییانە.
دەقی پەیامەکە:
بەناوی خودای بەخشندە و میهرەبان
بەبۆنەی پەسەندكردنی بودجە لە لایەن ئەنجومەنی نوێنەرانی عێراقەوە دەستخۆشی لە گشت لایەنە سیاسییە كوردستانی و عێراقییەكان دەكەم. هەروەها سوپاسی شاندی حكومەتی هەرێم و فراكسیۆنە كوردستانییەكان و فراكسیۆنەكانی تری ناو ئەنجومەنی نوێنەرانی عێراق دەكەم كە بە ماندووبوون و هیمەت و پێداگرییانەوە توانیان لەگەڵ یەكتر بگەنە ئەنجام و بەشی هەرێمی كوردستانیش لە بودجەی عێراقدا جێگیر بكەن.
پەسەندبوونی بودجەی عێراق هەنگاوێكی ئیجابی و بە ئاراستەی دروستە و هیوای ئەوە دەخوازین كە دەستپێكێك بێت بۆ بەهێزكردنی بنەماكانی دیالۆگ و پێكەوەژیان و هەروەها گەڕاندنەوەی بنەماكانی شەراكەتی نێوان پێكهاتەكانی عێراق.
