قائیمقامیەتی چەمچەماڵ هاوڵاتیان لە فێڵێکی نوێ ئاگادار دەکاتەوە

لڤین:
قائیمقامیەتی چەمچەماڵ، هاوڵاتیان و کاسبکاران، لە جۆرە فێڵێکی نوێ ئاگادار دەکاتەوە و دەڵێت: کەسانێکی چەتە بە بیانووی کڕینی ئاسن و فافۆنەوە تەلەفۆن بۆ پیشەوەران دەکەن، بەڵام دواتر هەوڵی لێسەندنی پارە و ئۆتۆمبیلی کڕیارەکە دەدەن.
لە ئاگادارینامەیەکدا قائیمقامیەتی چەمچەماڵ، ئاگاداری سەرجەم پیشەوەر و کڕیارانی ئاسن لە سنووری شارۆچکەی چەمچەماڵ دەکات کە ماوەیەکە بە بیانووی ئاسن و فافۆن لە گوندەکانەوە تەلەفۆن دەکرێت بۆ کڕینی ئاسن، دوای سەردانی شوێنەکە لەلایەن کەسانی چەتە و ڕێگرەوە هەوڵی لێسەندی پارە و ئۆتۆمبیلی کڕیارکە دەدرێت.
قائیمقامیەتی چەمچەماڵ داواش لە هاوڵاتیانی شارۆچکەکە دەکات “لەکاتی هەر ڕووداوێکی لەو شێوەیەدا لە سنوری هەر ناحیەیەک بوون پەیوەندی بە هێزەئەمنیەکانی ناحیەکە یان بەڕێوەبەری ناحیەوە بکرێت هەروەها دەتوانن پەیوەندی بە ژمارە تەلەفۆنەکانی پۆلیسی چەمچەماڵ یان JCC بکەن (07705047009 یان 07501258214).
ڕاگەیەندراوەکەی قائیمقامیەتی چەمچەماڵ، ئاماژەی بۆ ئەوەشکردووە کە هێزەکانی پۆلیس و ئاسایش لە هەوڵی دۆزینەوەی ئەو کەسانەدان و ڕووبەڕووی یاسایان دەکەنەوە.