نامەیەک بە ئەدرەسی دروست

جمهوری ئیسلامی، کە ساڵانێکی زۆرە پێیان وایە شەڕی دوژمنەکانیان لە دەرەوەی ئێران ئەکەن و بۆ ئەو ئامانجەش گەلانی ئێرانیان برسی کردوە، مەترسی گەورەشیان بۆ حوکمدارێتی کۆمارەکەیان دروستکردوە… ئەمڕۆ بە بینینی وێنەی مەفرەزەیەکی پێشمەرگەی جەوانی کورد، بە ئاڵای کوردستانەوە لەخیابانێکی ئاوەدانی شارێکی کوردستانی ئێراندا، راچڵەکین .!
ئەو روداوە لەلای دەسەڵاتدارانی ئێران کاردانەوەی ناوخۆیی و دەرەکی گەورەی ئەبێت، بە مانایەکیتر ئەو نامەیەی ئەوگەنجە خوێنگەرمانە گەیاندیان گەورەتر و زیاترە لە چالاکی تەمەنێکی حیزبە ئۆپزسیۆنەکانی ئەمدیوی سنور ، دەنگ چەند فیشەکێکی هەوایی و رەنگ تەنیا ئاڵایەکی کوردستان بو، بەڵام ئاسمانێک لە هیوا و ئومێدی نەورۆز و بەهارێکی رەنگاڵەی لە سەرتاسەری ئێراندا، پەخشکرد، پارتیزانەکان تەنیا و تەنیا ئەوە ئامانجەکەیان بو، دروست پێکایان و سەرکەوتنێکی گەورەیان تۆمار کرد .
وانە و نمونەی کاری بانگەشەی پارتیزانی و هەستانەوە وبەرگری لە مێژوی شۆڕشە چەکدارییەکانی کورد و گەلانی دنیاشدا، زۆرن و گەلێکی بیستراون و نوسراون و بینراون، رەنگە جیاوازی ئەم چالاکییە، بە زەمین و زەمان خۆی جیابکاتەوە و وانە و وێنەیەکی بەسود و جوانتر بێت ، هەم بۆ کورد وەک نەتەوە و هەم بۆ حیزب و سەرکردەکانیان، تەنانەت بۆ حوکمڕانەکانی هەرێمی کوردستانی عێراقیش، هیوادارم بارتەقای ئەو گرنگیدان و کاردانەوانەی جمهوری ئیسلامی ئێران، هەمو ئەوانیش گرنگی پێبدەن، منیش بتوانم بە چەند وشەیەک ئیزافە بۆ ئەو پیرۆزباییەی نەورۆزی ئەمساڵ بکەم کە بە سوپاسەوە لەو گەنجانەی خیابانێکی ( شاری شنۆ ) وە پێم گەیشت و دڵخۆشی کردم .
یەکەم : دەسەڵاتدارانی ئێران گەر نامەکەیان بە ئەدرەسێکی دروست پێگەیشتبێ، لەوەڵامدا، بێ هەڵچون و شپرزەبون پێویستە بیر لە چارەسەری ئاشتی بۆ مەسەلەی کورد و ئاشتبونەوەی گشتی گەلانی ئێران بکەنەوە.
دووەم : سەرکردەی حیزبە ئۆپزسیۆنەکانی ئێران، هەرچی زووە کۆنگرەی کاری پێکەوەیی و رێکەوتن و بەرە و بەرنامەو سەرکردایەتی هاوبەش رێکبخەن .
سێیەم : نەزانی و گەندەڵی و تەنانەت خیانەتی سەرکردە و حیزب و حوکمڕانەکان، مانای بێئومێدی و ناشتنی خەون و هیواکانی گەلەکەمان نیە، ڕەوایی مەسەلەی مافەکانی ئەم کورد و کوردستانە نە بەزەبروزەنگی دوژمنەوە، نە بەهەوا و ئارەزوی بێزراوی حوکمداری خۆماڵیەوە پەیوەست و گرێدراوە .

بابەتی پەیوەندیدار

Back to top button