خورماتوو:

چەند چەکدارێک سێ جوتیاریان رفاند

لڤین:

بەرپرسی راگەیاندنی میحوەرەی باکوری حەشدی شەعبی رایگەیاند، سێ جوتیار لە گوندی حلێوە لە قەزای خورماتوو لەلایەن چەند چەکدارێکەوە رفێنراون.

عەلی حسێن بەرپرسی راگەیاندنی میحوەرەی باکوری حەشدی شەعبی بە ئێن ئاڕ تی راگەیاند، “ئەمشەو سێ جوتیار کە لە نەتەوەی عەرەبن بە مەبەستی چاککردنی ماتۆڕی ئاودانی بەرهەمەکانیان چوونەتە گوندی حلێوە لە قەزای خورماتوو، پاشان لەلایەن چەند چەکدارێکەوە رفێنراون.”

راشیگەیاند”لە دواتردا جوتیارەکان خانەوادەکانیان لە رێگای تەلەفۆنەوە ئاگادارکردووەتەوە و پێیان وتوون کە ئەوان لای چەکدارەکانن.”

ئەوەشی خستووەتەڕوو”چەکدارەکان لای خانەوادەی جوتیارەکان خۆیان بە داعش ناساندووە.”

هەر ئەمڕۆ، شانەی راگەیاندنی ئەمنی عێراق رایگەیاند، لە ماوەی ١٠ رۆژی رابردوودا فڕۆكەكانی هاوپەیمانان ١٣٣ جار پێگەکانی چەكدارانی داعشیان لە چیای قەرەچوغ بۆردومانكردووە.

ئەوەش لەکاتێکدایە، دوای جموجوڵەكانی داعش و ئەنجامدانی چەند كردەوەیەكی توندوتیژی لە سوریا و عێراق لە دوو مانگی رابردوودا، دەسەڵاتدارانی سەربازی بەغدا و دیمەشق، ئۆپراسیۆنە سەربازییەكانیان دژی چەكدارانی داعش زیاتر كردووە.

بابەتی پەیوەندیدار

زیاتر بخوێنەوە
Close
Back to top button