تاڵەبانی و حەکیم پرسی قەرەبووکردنەوەی کەسوکاری ئەنفالیان تاوتوێ کرد

لڤین:

قوباد تاڵەبانی، جێگری سەرۆک وەزیرانی هەرێم بە یاوەری تەیمور تاقانەی بەجێماوی ئەنفال سەردانی عەمار حەکیم سەرۆکی رەوتی حیکمە و هاوپەیمانێتی (عراقیون) یان کرد و پێکەوە تاوتوێی چۆنییەتی قەرەبووکردنەوەی کەسوکاری ئەنفالکراوانیان کرد لەلایەن حکومەتی فیدراڵەوە.

لە کۆبوونەوەکەدا کە ئەمڕۆ لە بەغدا بەڕێوەچوو، قوباد تاڵەبانی باسی لە پێویستیی قەرەبووکردنەوەی کەسوکاری ئەنفالکراوان و بەرکەوتووانی کیمیابارانی هەڵەبجەی کرد لەلایەن حکومەتی فیدڕاڵەوە و داوای لە عەمار حەکیم و رەوتی حیکمە کرد پشتگیری دۆسیەی قەرەبووکردنەوەی پاشماوەکانی جینۆسایدی کورد بکەن.

لە بەشێکی کۆبوونەوەکەدا تەیمور تاقانەی ئەنفال کە شایەتحاڵی پرۆسەی ئەنفال و رزگاربووی گۆڕە بە کۆمەڵەکانە، چیرۆکی خۆی و کەسوکارەکەی گێڕایەوە کە چۆن ئەنفال کراون و بەرەو گۆڕە بەکۆمەڵەکان براون، هەروەها باسی کێشە و گرفتەکانی کەسوکاری ئەنفالکراوانی کرد لەئێستادا.

لایخۆشیەوە عەمار حەکیم وێڕای کارلێککردنی لەگەڵ خەموژانی ئەنفالکراوان، تەیموری وەک شەهیدی زیندوو ناوبرد و وێڕای دەربڕینی پشتگیری خۆی بۆ قەرەبووکردنەوەی کەسوکاری ئەنفالکراوان و بەرکەوتووانی کیمیاباران، رایگەیاند پێویستە گرنگی زیاتر بدرێت بە دۆسیەی ئەنفال و چیرۆکەکانی ئەنفال بەجۆرێک کە  نەوەکانی ئێستا و داهاتووی عێراق ئاگاداری ئەو تاوانە گەورەیەبن کە رژێمی بەعس بەرامبەر بە گەلی کورد کردوویەتی.

بڕیارە هەر لە چوارچێوەی هەوڵەکانی کۆکردنەوەی پشتگیری بۆ قەرەبووکردنەوەی کەسوکاری ئەنفال و بەرکەوتووانی کیمیارانی هەڵەبجە، قوباد تاڵەبانی سەردانی لایەنە پەیوەندیدارەکانی دیکە بکات لە بەغدا.

بابەتی پەیوەندیدار

زیاتر بخوێنەوە
Close
Back to top button