نەتەوە یەکگرتووەکان: 10٪ی خەڵکی عێراق سکهەڵدەگوشن

لڤین: پرۆگرامی خۆراکی جیهانیی سەربە نەتەوە یەکگرتووەکان لە عێراق، ئاشکرایدەکات، رێژەی هەژاریی لە عێراق گەیشتووەتە 31.7٪ و 10٪ی خەڵکی عێراقیش سکهەڵدەگوشن بۆ ئەوەی بتوانن بەرگەی ئەم دۆخە بگرن.

عەبدولڕەحمان میجاج، نوێنەری پرۆگرامی خۆراکی جیهانیی سەربە نەتەوە یەکگرتووەکان (WFP) لە عێراق رایگەیاند، لە دوای دابەزینی بەهای دیناری عێراقی بەرامبەر بە دۆلاری ئەمریکی، نرخی سەبەتەی خۆراک بە بەراوردی نرخی پێشووتری 14%ی بەرز بووەتەوە.

دەشڵێت: “10٪ی خەڵکی عێراق مەمرە و مەژی گوزەران دەکەن، تا بەردەوامیی بە ژیان بدەن و سکهەڵدەگوشن بۆ ئەوەی بتوانن بەرگەی ئەم دۆخە بگرن، لەنێو ئەو خەڵکەشدا 35٪ هەرزانترین خۆراک دەکڕن و 27٪یش بە قەرز خواردنی رۆژانەیان دابیندەکەن.

نوێنەری رێکخراوەکە باسی ئەوەشیکردووە کە لە مانگی کانونی یەکەمی رابردوودا نزیکەی 3 ملیۆن هاوڵاتی لە عێراق کە 731 هەزاریان ئاوارەی ناوخۆیین، پارەی پێویستیان پێ نییە بۆ دابینکردنی خواردنی رۆژانەیان.

ئەوەشی خستووەتە ڕوو کە رێژەی هەژاری لە عێراق گەیشتووەتە 31.7 ٪ و داواشی لە وڵاتان کردووە هاوکاریی زیاتری عێراق بکەن.