تیمی پارێزەران:

ئاسایشی هەولێر ڕێگە نادات تیمی پارێزەران سەردانی پێنج سزادراوەكەی بادینان بكەن

لڤین:

به‌وته‌ی‌ تیمی پارێزەرانی‌ دۆسیەی چالاكوانان‌و ڕۆژنامەنوسانی بادینان، ئاسایشی گشتیی هەولێر ڕێگە نادات تیمی پارێزەرانی كەیسه‌كه‌ سەردانی پێنج سزادراوەكەی بادینان بكەن، هەر ئەمڕۆش دادگای 2ی تاوانەكانی هەولێر، دۆسیەی پێنج سزادراوەكەی ڕەوانەی دادگای تەمیز كرد.

بەشدار حەسەن، پارێزەری دۆسیەی چالاكوان‌و ڕۆژنامەنوسانی بادینان بەسایتی‌ ڕۆژنیوزی ڕاگەیاندووه‌، ئەمڕۆ سەردانی ئاسایشی گشتیی هەولێریان كردووه‌، بەڵام ئاسایش ڕێگەی نەدا بچنە ژورەوە بۆ ئەوەی چاویان بەشێروان شێروانی‌و هاوڕێكانی بكەوێت.

وتیشی، بیانووی ئاسایش ئەوەبو كە ئەفسەری ڕێگەپێدانی زیندانییان، ئەمڕۆ لەدەوام نەبوە.

سەبارەت بەبڕیاری دادگای تەمیز بۆ بڕیاری ڕۆژی ١٦ی شوبات كە تێیدا داداگای 2ی تاوانەكانی هەولێر، بڕیاری شەش ساڵ زیندانیی بەسەر پێنج چالاكوان‌و ڕۆژنامەنوسی بادیناندا سەپاند، بەشدار حەسەن ده‌ڵێت، ئەمڕۆ دادگا دۆسیەكەی ناردوە بۆ دادگای تەمیز، لێرەوە ڕۆڵی دادگای تەمیز دەستپێدەكات‌و پێداچونەوە بەو بڕیارەدا دەكات‌و بڕیاری كۆتایی لەبارەی كەیسی ئەو پێنج چالاكوانەی بادینان دەردەكات.

بابەتی پەیوەندیدار

Back to top button