کازمی داوای ڕێککەوتنی هەولێر و بەغدا دەکات

لڤین: مستەفا کازمی، داوا لە ئۆپۆزسیۆنی حکومەت دەکات گفتوگۆیەکی کراوە و راشکاوانە ئەنجام بدەن لەسەر بنەمای بەرژەوەندی وڵات، هاوکات داوای گفتوگۆیەکی نیشتیمانیی بۆ رێککەوتنی نێوان هەولێر و بەغدا دەکات.

مستەفا کازمی سەرۆک وەزیرانی عێراق، لە پەیامێکی ڤیدیۆییدا، ڕایگەیاند: سەردانی پاپافرانسیس، پاپای ڤاتیکان بۆ عێراق بەرجەستەی جەوهەری گەلی کرد بە بەهاکانی ئاشتی و دادپەروەری، پەیامەکەی پاپاش بۆ سەردانی شارەکانی عێراق بە جیهان گەیشتووە، ئێستاش دەرفەتێکی گرنگە بۆ گەڕانەوەی رۆڵی مێژویی عێراق لە ناوچەکە و جیهان.

هەر لە پەیامەکەدا کازمی داوای لە ئۆپۆزسیۆنی حکومەت کرد گفتوگۆیەکی کراوە و راشکاوانە ئەنجام بدەن لەسەر بنەمای بەرژەوەندی وڵات و ئاسایش و سەروەریی وڵات و هەمو لایەک پشتیوان و هاوکاربن بۆ سەرخستنی هەڵبژاردنی گشتی پێشوەختە و متمانەی هاوڵاتی بە دیموکراسی و وڵات بگەڕێننەوە.

هاوکات جەختی کردەوە کە “پێویستە هەموو ئاین و مەزهەب و نەتەوەکان دەست لەناو دەست بن، هاوشێوەی ئەوەی عەلی سیستانی و پاپا فرانسیس دەستیان خستە ناودەستی یەکتری، حکومەتیش پشتئەستورە بە ئیرادەی گەل لەپێناو بەدیهێنانی ئاسایش و ئاشتی و بوژاندنەوە و گەشەسەندن”.

مستەفا کازمی سەبارەت بە پرسی نێوان هەرێم و ناوەندیش داوایکرد، گفتوگۆیەکی نیشتیمانیی لەنێوان حکومەتی فیدراڵی و هەرێمی کوردستان ئەنجام بدرێت بۆ گەیشتن بە رێککەوتنی کۆتایی، کە تیایدا پارێزگاریی لە یەکێتی خاکی عێراق و چارەسەرکردنی کێشەکان لە ریشەوە بکات.

دووپاتیشیکردەوە کە “پێویستە وڵاتانی ناوچەکە دەست لەدەستوەردانەکانیان هەڵبگرن و شەڕ و کێشە و ناکۆکییەکانیان نەهێننە گۆڕەپانی عێراقەوە، لەبەرامبەردا عێراق ئامادەیە، بۆ کردنەوەی سەرجەم دەرگاکانی گفتوگۆ بۆ چارەسەرکردنی کێشەکانی ناوچەکە”.

بابەتی پەیوەندیدار

Back to top button