سه‌رۆک کۆماری عێراق: ڕاپەڕین بووه‌ ده‌روازه‌ی گۆڕانکاری راسته‌قینه‌

لڤین: سه‌رۆک کۆماری عێراق، لە یادی 30 ساڵەی ڕاپەریندا دەڵێت: ڕاپەڕین بووه‌ ده‌روازه‌ی گۆڕانکاری راسته‌قینه‌ و کۆتایهێنان به‌ رژێمی دیکتاتۆری و به‌رقه‌رارکردنی دیموکراسی.

به‌رهه‌م ساڵح، سه‌رۆک کۆماری عێراق، بۆ یادی 30 ساڵەی ڕاپەرینی خەڵکی کوردستان راگەیەندراوێکی بڵاو کردەوە.

لە بەشێکی راگەیەندراوەکەدا هاتووە: پێویسته‌ له‌م یاده‌دا به‌هاکانی راپه‌ڕین به‌رز رابگیرێن به‌ رێزگرتن له‌ داخوازی و مافه‌کانی خه‌ڵک، به‌کۆتایهێنان به‌ ناعه‌داله‌تی و گه‌نده‌ڵی، پێویسته‌ به‌ کرده‌وه‌ گه‌ل سه‌رچاوه‌ی هه‌موو ده‌سه‌ڵات و شه‌رعیەته‌کان بێت و خزمه‌تکردنی هاوڵاتیان و به‌رجه‌سته‌کردنی به‌ها نیشتمانییه‌ راسته‌قینه‌کان بکرێنه‌ پێوه‌ری کارکردن.

دەقی ڕاگەیەندراوەکە:

پیرۆزبایی سەرۆک کۆماری عێراق بەبۆنەی یادی (٣٠) ساڵەی راپەرینی ساڵی ١٩٩١

پیرۆزبایی یادی (٣٠) ساڵه‌ی راپه‌ڕینی ساڵی ١٩٩١ له‌ خه‌ڵکی کوردستان و سه‌رجه‌م گه‌لی عێراق ده‌که‌م که‌ بووه‌ ده‌روازه‌ی گۆڕانکاری راسته‌قینه‌ و کۆتایهێنان به‌ رژێمی دیکتاتۆری و به‌رقه‌رارکردنی دیموکراسی.

راپه‌ڕینی ساڵی ١٩٩١ وره‌چه‌رخانێکی گه‌وره ‌و مانادار بوو، خه‌باتی خه‌ڵک و پێشمه‌رگه‌ ئاوێته‌ی یه‌کتر بوون بۆ کۆتایهێنان به‌ زوڵم و زۆداری.

پێویسته‌ له‌م یاده‌دا به‌هاکانی راپه‌ڕین به‌رز رابگیرێن به‌ رێزگرتن له‌ داخوازی و مافه‌کانی خه‌ڵک، به‌کۆتایهێنان به‌ ناعه‌داله‌تی و گه‌نده‌ڵی، پێویسته‌ به‌ کرده‌وه‌ گه‌ل سه‌رچاوه‌ی هه‌موو ده‌سه‌ڵات و شه‌رعیەته‌کان بێت و خزمه‌تکردنی هاوڵاتیان و به‌رجه‌سته‌کردنی به‌ها نیشتمانییه‌ راسته‌قینه‌کان بکرێنه‌ پێوه‌ری کارکردن.

یادکردنه‌وه‌ی ئه‌م بۆنه‌ پیرۆزه‌ به‌وه‌ ده‌کرێت که‌ کاربکه‌ین بۆ به‌رقه‌رارکردنی حوکمڕانییه‌کی دروست به ‌ئاڕاسته‌ی تێپه‌ڕاندنی قه‌یران و ئاسته‌نگه‌کان دوور له‌ ململانێ و به‌رژه‌وه‌ندی حزبی به‌رته‌سک و به‌گژداچوونه‌وه‌ی گه‌نده‌ڵی و گه‌نده‌ڵکاران به‌ کرده‌وه‌، ئه‌مه‌ش له‌ رێگای به‌شداریی راسته‌قینه‌ی خه‌ڵک و له‌به‌رچاوگرتنی داخوازییه‌ ره‌واکانیان.

به‌رهه‌م ساڵح

سه‌رۆک کۆماری عێراق

بابەتی پەیوەندیدار

Back to top button