بەهار مەحمود داوادەکات بەشێک لە بەعسییەکان دوورنەخرێنەوە
لڤین: بەهار مەحمود، پەرلەمانتاری گۆڕان لە پەرلەمانی عێراق داوادەکات بەشێک لە بەعسییەکان دوورنەخرێنەوە و دەڵێت: دوورخستنەوەی ئەو بەعسیانەی دەستیان بە خوێن سوورنەبووە كارێكی باش نییە و پێویستە سوود لەو توانایانە وەربگرین.
بەهار مەحمود، ئەندامی فراكسیۆنی گۆڕان لە پەرلەمانی عێراق، لە ڕاگەیەندراوێكدا ئاشکرایکردووە کە لەگەڵ ئەوەدانیە بەشێک لە بەعسییەکان دووربخرێنەوە و لەو بارەیەوە دەڵێت “ئێمە لەگەڵ ئەوەداین ئەو بەعسییانەی دەستیان هەبووە لە كارەكانی ڕژێمی بەعس دەرهەق بە گەل، سزابدرێن و لە دەسەڵات دووربخرێنەوە بۆ ئەوەی ئەو ڕێبازە لە دەسەڵاتدا نەمێنێتەوە”.
ئەوەش دەڵیت کە بەڵام “كەسانێك هەن كە تەنها لەسەر كاغەز بەعسی بوون و بە ناچاری بووبوون بە بەعسی، حكومەتیش پێویستی بە تواناكانیانە، من لەگەڵ ئەوەدا نیم ئەو كەسانە لەژێر هەر ناوێكدا دووربخرێنەوە”.
بەهار مەحمود لەڕاگەیەندراوەکەدا دەشڵێت “لەم كاتەدا وڵات بە سەختترین كاتەكانیدا گوزەر دەكات و پێویستیمان بە رۆڵەكانیەتی بۆ پەرەپێدان و پێشخستنی، بۆیە هیچ ڕێگرییەك نییە لەوەی سوود لەو توانایانە ببینین”.
لەکۆتایشدا دەڵێت “دوورخستنەوەی بەعسییە بەتواناكان ئەوانەی دەستیان بە خوێن سوورنەبووە، كارێكی باش نییە”.
