مامۆستایەك: لە دووی متەوەستەوە هەموو ساڵێك قۆپیم كردووە

ئەمە وتەی ” مامۆستایەكی زانكۆیە” ئەو زۆر بە موسەیتەریەوە، زۆر بە خۆشی و ئازایەتیەوە لەبەرنامەیەكی تەلەفزیۆنیدا ئاماژە بە قۆپیەكردن دەكات، لە كاتێكدا قۆپیەكردن هێڵی سورە لە پەروەردەو فێركردندا و قورسترین سزای هەیە لە رێنماییەكانی پەروەردەدا، ئەگەر قوتابیەك گزی بكات ئەوا ئەو ساڵە سەرجەم وانەكانی بۆ دەكرێت بە غەش و ساڵی دواتریش مافی خوێندنی نامنێت و بۆ ساڵی دوایی دەتوانێت لە ئێواران بخوێنیت.

هێلە سورەكانی پەروەردەو فێركردن خەریكە ووردە ووردە كاڵ دەبنەوە، هێڵە سورەكانی كۆمەڵگە ووردە ووردە دەسڕدرێنەوە، ئەو لەبەردەم كامێراو چەندین جار دەیڵێتەوە كە قۆپیەیكردووە، كەسێكی تر زۆر بەخۆشی و ئازادانە دەڵێت منداڵەكەم لەو كوڕەی فڕیداوە، مۆدێڵێكیش دەڵێت، بەیەك ساڵ بومە خاوەنی كۆمپانیا و ئۆتۆمبێلی ئاخر مۆدیڵ و مانگەی (5 دەفتەر ) دۆلار.

كاتێك مامۆستایەك بە شانازیەوە باس لە قۆپی دەكات، ئیتر چی واتایەك بۆ بەرنامەو رێنمایی و پەروەردە دەمێنێـتەوە، لە هیچ پرۆسەیەكی پەروەردەی جیهاندا رێگە بە قۆپیەكردن نادرێت و بانگەشەكردن بۆ قۆپیەكردن هێڵی سوری پەروەردەیەو رێگەش نادرێت بە ئاسایی لە میدیاكانەوە پەروەدەكارێك شانازی پێوە بكات و قوتابیەكانی هان بدات بۆ قۆپیەكردن، قۆپیەكردن و ئاشكراكردنی پرسیار و پێوتنەوە، هێڵە سورەكانی پەروەردەو فێركردنن و هەر هەولێك بە ئاراستەی ئاساییكردنەوەو حەڵاڵكردنیان هەوڵێكە بە ئاراستەی بێبەهاكردنی بنەماكانی پەروەردەو فێركردن، كە لە ئێستادا خۆی لە ئیشكالێەتێكی گەورەدایە، كە ئەمە هیچی كەمتر نیە لە پەلاماردانی مامۆستا و دامەزراوەكانی پەروەردە.

میدیا خەریكە دەبێتە وێرانكەری پەروەردەو فێركردن و هەڵوەشانەوەی دامەزراوە كۆمەڵایەتیەكان، لە كۆمەڵگەیەكدا قوتابخانە پەروەردەكاری بنەڕەتی منداڵانەو خێزانیش بەهێزترین دامەزراوەی كۆمەڵایەتیەو ترادسیۆنە كۆمەڵایەتی و ئایینیەكان رۆڵی گەورە لە ئاراستەكردنی كۆمەڵگە دەبیینن، لەبەر ئەوەی خێرایی تەكنەلۆجیا و داب و نەریت و گەشەی كۆمەڵایەتی لە كۆمەڵگەی كوردیدا هاوتەریب ناڕۆن، بۆیە هەمیشە كێشە كۆمەڵایەتیەكان لە كۆمەڵگە تازە گەشەكردووەكاندا زیاتر دەبن.

ئەوەی ئەتوانێت كێشەكان نەئاڵۆزێنێت و هاوسەنگی لە نێوان پەروەردەو تەكنەكۆجیا و ترادسیۆنە كۆمەڵایەتیەكانادا درووست بكات، مێدیایە، مێدیایەك كە بتوانێت بە خوێندنەوەی قوڵ و ستراتیژی و پلانی ووردەوە كۆمەڵگە ئاراستە بكات، نەك ئەوەی بەرنامەی بێپلان و بێ ستراتیژ و دوور لە پەروەردەو بنەماكانی كۆمەڵگە پێشكەش بكات و تەنانەت پرۆگرامەكان دوور لە یاساو رێنماییە بنەڕەتیەكانی پەروەردەو فێركردن و ترادسیۆنە كۆمەڵایەتیەكان.