مەلا بەختیار: لەنێو دەزگای زانیاریەوە ژەهرخوارد كراوم
لڤین:
مەلا بەختیار ئەندامی ئەنجومەنی باڵا و بەرژەوەندی یەكێتی ئاشكرای كرد، لەنێو دەزگای زانیارییەوە ژەهرخوارد كراوە، تاوەكو ئێستاش وەڵامی داواكەی نەدراوەتەوە و ئەگەر وەڵام نەدرێتەوە كەیسەكە دەباتە دادگا.
مەلا بەختیار لە چاوپێكەوتنێكی تەلەفزیۆنیدا وتویەتی، لەنێو دەزگای زانیارییەوە ژەهرخوارد كراوە، بەڵام ناوی كەس ناهێنێت و دەیەوێت حزبەكەی لێكۆڵینەوە بكات، ئەگەرنا 200% ژەهرخوارد كراوە.
رونیشیكردووەتەوە، ئەو نامەیەی لەوبارەیەوە ئاڕاستەی بافڵ تاڵەبانی و كارگێڕی مەكتەبی سیاسی كردووە تاوەكو ئێستا وەڵامی نەدراوەتەوە، لەكاتێكدا بەرپرسیارێتی ئەخلاقی و سیاسییان بوو وەڵامی بدەنەوە.
سەبارەت بە چۆنێتی ژەهرخوارد كردنەكەی مەلا بەختیار باسی لەوە كردووە، زانیارییەكانی بە بافڵ تاڵەبانی وتووە و راپۆرتی پزیشكی پێداون، نازانێت بۆچی وەڵامی نادەنەوە، پێیوایە دەترسن لەوەی یەكێك لە بەرپرسە باڵاكانی نێو دەزگای زانیاری ئاشكرا بێت، ئەو پشوو دریژە بەڵام ئەگەر هەر وەڵامی نەدرێتەوە كەیسەكە دەباتە دادگا.
