لە هەولێر لەسەر شکاندنەوەی ئۆتۆمبێل شەڕەتەقە دروستبوو
لڤین: پۆلیسی هەولێر، ڕایگەیاند، لەسەر شکاندنەوەی ئۆتۆمبێل، لە یەکێک لە شەقامەکانی ناوشار دوو شۆفێر بووەتە دەمەقاڵێیان و شەڕەتەقە دروستبووە.
پۆلیسی هەولێر، لە ڕاگەیەندراوێکدا ئاشکرایکرد کە بەشی پۆلیسی فریاکەوتنی هەولێر، ئاگادارکراونەتەوە لە بوونی ڕووداوێکی شەڕ و تەقەکردن لە شەقامی 40 مەتری نزیک نەخۆشخانەی لەدایکبوون، لەناو شاری هەولێر، کە شوفێری دوو ئۆتۆمبێل لە جۆرەکانی (کیا کادێنزا) و (تیۆتا کرۆلا تەکسی) لەسەر شکاندنەوەی ئۆتۆمبێل ببووە دەماقاڵەیان و یەکێک لە شوفێرەکان تەقەی کردووە.
ئاماژەی بۆ ئەوەشکردووە کە پۆلیسی فریاکەوتنی هەولێر، دەستبەجێ گەیشتوونەتە شوێنی ڕووداوەکە و هەردوو شوفێرەکەیان بە ناوی (ا.ش.م) و (ا.ھ.ع) دەستگیر کردووە، هەروەها لە کاتی دەستگیرکردنیشیاندا، دەست بەسەر هەردوو ئۆتۆمبێلەکە و دەمانچەیەکی جۆری (ولتەر)دا گیراوە.
پۆلیسی هەولێر، ڕاشیگەیاندووە، دوای دەستگیرکردنیان دوو شۆفێرەکە ڕادەستی بنکەی پۆلیسی ئاشتی کراون بە مەبەستی گرتنەبەری ڕێکاری یاسایی بەرامبەریان.
ماوەیەکە ڕووداوەکانی تەقەکردن لە شارەکانی هەرێم زیادییان کردووە.
