وتەبێژی ئەوقافی هەرێم: بۆ دیاریکردنی یەکەم ڕۆژی جەژن لیژنەی باڵای بینینی مانگ کۆ دەبێتەوە
لڤین:
وتەبێژی وەزارەتی ئەوقاف و کاروباری ئایینیی حکوومەتی ھەرێمی کوردستان وتی، بۆ دیاریکردنی یەکەم ڕۆژی جەژنی ڕەمەزان ڕۆژی شەممە لیژنەی باڵای بینینی مانگ کۆ دەبێتەوە و ئەگەر مانگ بیندرا، ڕۆژی یەکشەممە دەبێتە جەژن و ئەگەر نەبیندرا ڕۆژی دووشەممە دەبێتە جەژن و ئێمە بۆ دیاریکردنی ڕۆژی جەژنیش تەنھا پشت بە خۆمان دەبەستین .
نەبەز ئیسماعیل وتەبێژی وەزارەتی ئەوقاف و کاروباری ئایینیی ڕایگەیاند: ”ڕۆژی شەممە لیژنەی باڵای بینینی مانگ لە دیوانی وەزارەتی ئەوقاف بە ھەماھەنگی لەگەڵ لیژنە لاوەکییەکان لە پارێزگاکان بۆ دیاریکردنی ڕۆژی جەژن کۆ دەبێتەوە و ئەگەر مانگ بیندرا، ڕۆژی یەکشەممە دەبێتە جەژن و ئەگەر نەبیندرا مانگی ڕەمەزان سی ڕۆژ دەبێت و ڕۆژی دووشەممە دەبێتە جەژن.”
وتەبێژی وەزارەتی ئەوقاف و کاروباری ئایینیی حکوومەتی ھەرێمی کوردستان ڕوونیشی کردەوە: ”تا ئێستا دیار نییە ئەم مانگە سی ڕۆژ دەبێت، یان بیست و نۆ ڕۆژ، بۆیە ئەوەی دەگوترێت فڵانە ڕۆژ جەژنە ڕاست نییە، چونکە ئێمە پشت بە بەڵگە شەرعییەکان دەبەستین، نەک ئەوەی باسی لێوە دەکرێت، فەلەکناسییە یان شوێنی دیکە و ئێمە پشت بە خۆمان دەبەستین و لیژنەی باڵای بینینی مانگ بڕیار دەدات”.
نەبەز ئیسماعیل ئاماژەی بەوەش کرد : ”ئێمە پەیوەندیمان لەگەڵ وەقفی سوننی عێراق هەیە و کۆبوونەوەی بەردەواممان لەگەڵ ئەوان ھەیە و پشت بە ھیچ وڵاتێک نابەستین و بڕیاری تایبەت بە خۆمان ھەیە و پشت بە خۆمان و بەڵگە شەرعییەکانی خۆمان دەبەستین بۆ دیاریکردنی ڕۆژی جەژن.”
