ناوەڕۆکی کۆبونەوەی مەرور بارزانی و ئەردۆغان ئاشکرا بوو

لڤین:

سەرۆکی حکومەتی هەرێم لەگەڵ سەرۆک کۆماری تورکیا کۆبویەوە و گفتوگۆیان لە بارەی فراوانکردنی هاوکاری ئاسایشی لە نێوان هەردوولا کرد.

مەسرور بارزانی ئەمرۆ سەردانی تورکیای کرد و لەگەڵ ڕەجەب تەیب ئەردۆغان، سەرۆک کۆماری تورکیا کۆبونەوە و سەرۆکی حکومەتی هەرێم لە بارەی ناوەڕۆکی کۆبونەوەکەیان ڕاگەیەندراوێکی  بڵاوکردەوە.

بارزانی دەڵێت “لە کۆبوونەوەکەدا گفتوگۆمان دەربارەی بارودۆخی عێراق و ناوچەکە و پەیوەندییەکانی هەرێمی کوردستان و تورکیا کرد و جەختمان لە فراوانکردنی دەرفەتەکانی ھاریکاری لە پێناو ئاسایش و سەقامگیریی ناوچەکەدا کرد”.

ئاماژەی بەوەشکردووە “ھەردوولا خواستی خۆمان بۆ گرنگیی برەودان بە هەماهەنگیی و پەیوەندیی دوولایەنە لە هەموو بوارەکاندا بە تایبەتی لە بواری ئابووری و ئاڵۆگۆڕی بازرگانی، لە سەر بنەمای بەرژەوەندی هاوبەش، دووپات کردەوە”.

دوای کۆبوونەوەکە وینەیەکی کۆبونەوەکە کە مەسرور بارزانی خۆی لە فەیسبووک بڵاویکردبوویەوە لە پەڕەکەی سڕایەوە، لە تۆڕە کۆمەڵایەتیەکانیش هۆکاری سڕینەوەی بۆ بچوک دەرکەوتنی شاندەکەی مەسرور بارزانی دەگەڕێندریتەوە.