لقی سلێمانی سەندیکای ڕۆژنامەنووسان سكاڵای یاسایی لەسەر چەند دەزگایەكی میدیایی تۆمار كرد

لڤین:

سەندیكای رۆژنامەنوسان رایگەیاند: پاش ئەوەی چەند دەزگایەكی میدیایی لەسەر خولێكی رۆژنامەنووسی سلێمانی چەندین بوختان و دەلەسەیان بڵاوكردەوە، ئەمڕۆ دووشەممە لقی سلێمانی سكاڵای رەسمی لەسەر ئەو دەزگایانە تۆماركرد.

بەگوێرەی ڕاگەیەندراوێكی سەندیكادا هاتووە: لقی سلێمانی خولێكی فێركاری سەركەوتووی بە دوو كۆرس ئەنجامدا كە كۆرسێك لە سلێمانی و كۆرسێك لە شاری ئەسفەهانی وڵاتی ئێران ئەنجامدراو نزیكەی بیست رۆژنامەنووسی شاری سلێمانی بەشدار بوون.

ئاماژەبەوەكراوە، پاش تەواوبوونی خولەكە چەند میدیایەكی رەسمی و سێبەر لە هەولێرەوە كەوتنە بڵاوكردنەوەی قسەی سەیرو بێ بنەماوهەڵبەستنی تۆمەت و بوختان بۆ بەشداربوانی خولەكەو سكرتێرو ستافی لقی سلێمانی سەندیكاكەو تۆمەتی زۆر نارەواو نابەجێیان دایە پاڵیان و لە خانەی ئەدەب و راستگۆیی دەرچوون و تەنانەت كاریان گەیاندە ئەو رادەیەی بڵێن ئەو گەنجانە كاریان بۆ وڵاتێكی تر كردوە، بۆیە ئەمڕۆ سكرتێری لقی سلێمانی سكاڵای یاسایی لەسەر ئەو دەزگایانە تۆمار كرد كە خاوەنی مۆڵەتی رەسمین (باس-وشە) و ئەو دەزگایانەش كە وەك سێبەر بە بێ خاوەندارێتی كار دەكەن لەماوەی داهاتوودا سكاڵایان لەسەر تۆمار دەكرێت.

هەرلە راگەیەندراوەکەدا هاتووەکە “رۆژنامەنووسان و شەقامی كوردستانیش دڵنیا دەكەینەوە كە یاسا دەكەینە سەروەرو تا ئەو كاتەی ماهیەت و رادەی راستگۆیی ئەو كەناڵانە بۆ خەڵك دەرنەخەین دەستبەرداری كەیسەكە نابین و مەرجە ئەو دەزگا بەناو میدیاییانە داوای لێبووردنی رەسمی لە گەنجانی بەشداربووی خولەكە بكەن”.