جۆو بایدن نامەیەکی بۆ سەرۆکی هەرێم نارد

لڤین:

باڵیۆزی ئەمریکا لە عێراق سەردانی سەرۆکی هەرێمی کوردستانی کرد و نامەیەکی جۆ بایدن، سەرۆکی ئەمریکای گەیاندە نێچیرڤان بارزانی.

رۆژی چوارشه‌ممه‌ 30ی ئاداری 2022 نێچيرڤان بارزانى، سه‌رۆكى هه‌رێمى ‏كوردستان، پێشوازیى له‌ ماتيو توله‌ر، باڵيۆزى ئەمریکا له‌ عێراق كرد.‏ بەپێی راگەیێندراوی سەرۆکایەتیی هەرێمی کوردستان، “له‌ كۆبوونه‌وه‌يه‌كدا به‌ڕێز باڵيۆزى ئەمریکا نامه‌يه‌كى سه‌رۆك جۆ بايدن سه‌رۆكى ‏ویلایەتە يه‌كگرتووه‌كانى ئەمریکای گه‌ياندووەتە سه‌رۆك نێچيرڤان بارزانى كه‌ تێیدا ‏جه‌خت له‌ پشتگيريى ئەمریکا بۆ عێراق و هه‌رێمى كوردستان كراوه‌ته‌وه‌”.

لە راگەیێندراوی سەرۆکایەتیی هەرێمی کوردستاندا هاتووە، لە کۆبوونەوەکەدا هه‌ردوولا دۆخى سياسيى عێراق، هه‌نگاوه‌كانى پرۆسه‌ى سياسى و كۆبوونه‌وه‌كانى ‏ئه‌نجوومه‌نى نوێنه‌رانى عێراق، دۆخى هه‌رێمى كوردستان و پرۆسه‌ى هه‌ڵبژاردنه‌كانى ‏داهاتووى هه‌رێمى كوردستان، په‌يوه‌ندييه‌كانى هه‌ولێر ـ به‌غدا و پێشبينييه‌كانيان بۆ ‏داهاتووى پرۆسه‌ى سياسی له‌ وڵات تاوتوێ كرد.‏

له‌ كۆبوونه‌وه‌كه‌دا هه‌ردوولا هاوڕا بوون له‌سه‌ر پێويستيى هه‌بوونى سيستمێكى حوكمڕانيى ته‌ندروست له‌ عێراق له‌سه‌ر بنه‌ماى متمانه‌ و هاوبه‌شيى راسته‌قينه‌ و پابه‌نديى به‌ ده‌ستوور و بنه‌ماكانيه‌وه‌ كه‌ ته‌نيا رێگه‌يه‌ بۆ ئارامى و سه‌قامگيرى و ‏جه‌ختيان له‌ گرنگيى بنياتنانى متمانه‌ و لێكگه‌يشتنى هاوبه‌شیى نێوان لايه‌نه‌ ‏عێراقييه‌كان بۆ تێپه‌ڕاندنى دۆخه‌كه‌ و چاره‌سه‌ركردنى كێشه‌كان كرده‌وه‌.‏

گفتوگۆى لايه‌نه‌كان له‌سه‌ر ياساى هه‌ڵبژاردن له‌ هه‌رێمى كوردستان، گرنگيى ‏يه‌كڕيزيى لايه‌نه‌ كوردستانييه‌كان له‌ به‌غدا و كارى پێكه‌وه‌يى له‌گه‌ڵ لايه‌نه‌ عێراقييه‌كان، گرنگيى به‌رده‌واميى گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كان، په‌يوه‌ندييه‌كانى هه‌رێمى كوردستان و عێراق له‌گه‌ڵ وڵاتانى ناوچه‌كه‌، ‏شه‌ڕ و دۆخى ئۆكراينا و كاريگه‌رييه‌كانى و وتووێژى ڤيه‌ننا له‌سه‌ر دۆسيه‌ى ئه‌تۆمى چه‌ند ته‌وه‌رێكى ديكه‌ى كۆبوونه‌وه‌كه‌ بوون كه‌ كۆنسولى گشتيى ئەمریکا له‌ ‏هه‌رێمى كوردستان ئاماده‌ى بوو.‏

بابەتی پەیوەندیدار

Back to top button