باندێکی نۆ کەسی ماددەی هۆشبەر دەستگیرکران
لڤین:
پۆلیسی سلێمانی رایگەیاند، هێزەكانی بنكەی پۆلیسی وارماوای سەربەبەشی پۆلیسی شارەزوور باندێكی 9 كەسییان دەستگیركرد كە بەكارهێنەرو بازرگانی مادەی هۆشبەر بوون.
بەڕێوەبەرایەتی پۆلیسی پارێزگای سلێمانی رایگەیاند، پاش بەدواداچونەكانی بنكەی پۆلیسی وارماوا بۆ دەستگیركردنی كەسانی لەیاسا دەرچوو، پاڵپشت بەزانیارییەكانی هێزەكانی پۆلیس و بەسەرپەرشتی ڕاستەوخۆی بەڕێوەبەری پۆلیسی پارێزگای سلێمانی توانرا لە چەند چالاكییەكی جیادا 9 تۆمەتبار بەتۆمەتی بەكارهێنان و بازرگانیكردن بە مادەی هۆشبەر دەستگیربكرێن .
بە گوێرەی راگەیەندراوەکەی پۆلیسی سلێمانی: سەرجەم تۆمەتباران بەناسنامە كوردن و توانراوە لە ( ناحیەی عەربەت، گەرەكەكانی هووانە، كانی كوردە و سەرچنار) لە شاری سلێمانی دەستگیربكرێن و بەشێك لەوتۆمەتبارانە لەكاتی بەكارهێنانی مادەی هۆشبەردا دەستگیركراوان .
پۆلیس دەشڵێت، سەرجەم تۆمەتباران بەبڕیاری دادوەر و بەپێی ماددەی 26 و 30 یاسای بەرەنگاربوونەوەی ماددە هۆشبەرەكان و كارتێكەرە عەقڵییەكان راگیراون و لەكاتی دەستگیركرنیشیاندا دەستگیراوە بەسەر بڕێك مادەی هۆشبەر لە جۆرەكانی هیرۆین، دەرزی هیرۆین و شیشە و كەلوپەلی بەكارهێنانی مادەكان .
باسی لەوەشکردووە، سێ لە دەستگیرکراوەکان لە ڕەگەزی مێن و بەشێك لەو تۆمەتبارانە پێشینەی تاوانی دزیكردن و بەكارهێنانی مادەی هۆشبەریان هەبوە و پێشتر سزادراون .
