موقتەدا سەدر:
پێویستە حكومەت بەرامبەر هێرشە موشەكیەكان دەستەوەستان نەبێت
لڤین: رێبەری رەوتی سەدر پەیامێكی لەبارەی هێرشە موشەكیەكەی ئەمشەوی بەغداد بڵاوكردەوە و رایگەیاند، ئەو جۆرە هێرشانە مەترسی لەسەر ژیانی هاوڵاتیان دروستدەكات، لەسەر حكومەت پێویستە چیتر دەستەوەستان نەبێت.
موقتەدا سەدر لە تویتێكدا لە هەژماری تایبەتی خۆی رایگەیاند، بەكارهێنانی چەك و بۆردومانكردن و بەئامانجگرتنی بارەگا دیبلۆماسیەكان لە عێراق زیاتر دەبێت، ئەوەش بووەتە هۆكار بۆ زیادبوونی مەترسیەكان لەسەر ژیانی هاوڵاتیانی مەدەنی گەلی عێراق.
ناوبراو لەو پەیامەیدا دەشڵێت ” ترساندنی هاوڵاتیانی مەدەنی و دروستكردنی مەترسی بۆسەر ژیانیان لەگەڵ بەرگریكردن یەكدەگرێتەوە، یان ئەوە ناوبانگەكەی دەشێوێنێت و خۆشەویستی لە دڵی خەڵكدا كەمدەكاتەوە؟”.
موقتەدا سەدر ئەوەشی خستەڕو، لەسەر حكومەت پێویستە چیتر دەستەوەستان نەبێت لەئاست هێرشەكان، بە پێویستی دەزانێت كاردانەوە و وەڵامی هەبێت بۆ ئەو گروپ و لایەنانەی ئەو جۆرە كارانە ئەنجام دەدەن.
