ژمارەی ئاوارەکانی ئۆکراینا 500 هەزار کەسی تێپەڕ کرد

لڤین:

نەتەوە یەکگرتووەکان رایگەیاند، لە چوار رۆژی رابردوودا زیاتر لە 500 هەزار هاوڵاتیی ئۆکراینا ئاوارەی وڵاتانی دراوسێ بوون.

فیلیپۆ گراندی، بەرپرسی ئاژانسی ئاوارەکان لە نەتەوە یەکگرتووەکان رایگەیاند “زیاتر لە 500 هەزار ئاوارە لە ئۆکرایناوە بۆ وڵاتانی دراوسێی ئاوارە بوون”.

نەتەوە یەکگرتووەکان دەڵێت، لە کۆی ئەو ژمارەیە لە ئاوارەکان کە زیاترە لە 500 هەزار کەس زیاتر لە 280 هەزار کەسیان چوونەتە پۆڵەندا.  زیاتر لە 32 هەزار و 500 ئۆکراینی لە وڵاتەکەیانەوە چوونەتە رۆمانیا.

ئاماژەی بەوەشکردووە، نزیکەی 85 هەزار هاوڵاتیی ئۆکراینی لە سەرەتای دەستپێکردنی هێرشەکانی رووسیا بۆسەر ئۆکراینا، چوونەتە هەنگاریا. لانیکەم 70 هەزار ئۆکراینی چوونەتە مۆڵدۆڤا.

بەپێی ئامارەکانی نەتەوە یەکگرتووەکان، سلۆڤاکیا پێشوازیی لە نزیکەی 30 هەزار ئاوارەی ئۆکراینی کردووە. هاوکات بێلاڕووس، پێشوازیی لە زیاتر لە 300 ئاوارەی ئۆکراینی کردووە.

ڕوونیکردووەتەوە نزیکەی 34 هەزار و 600 کەس لەوانەی ئۆکراینایان جێهێشتووە و چوونەتە وڵاتانی دیکە، لەوێوە بەرەو وڵاتانی دیکەی ئەوروپا دەڕۆن. ئەوەجگە لەوەی کە لە ناوخۆی ئۆکرایناش نزیکەی 160 هەزار کەس ئاوارە بوون.