گروپێک دەستگیرکران کە بۆری نەوتیان کون کردووە
گروپێك بۆرییه‌كی گواستنه‌وه‌ی نه‌وتیان له سنووری پارێزگای هه‌ولێر كون كردبوو، له‌لایه‌ن پۆلیسی نه‌وت و گازی هه‌رێم ده‌ستگیر كران.
پۆلیسی نەوت و گازی هه‌رێمی كوردستان، راگەیه‌ندراوێکدا بڵاویكرده‌وه، هێزەکانمان توانیان گروپێکی دزی نەوت لە سنوری پارێزگای هەولێر دەستگیربکەن.
ده‌قی راگه‌یه‌ندراوه‌كه:
دوێنێ شەو (8 لەسەر 9-2-2022) کاتژمێر (01:30)ـی شەو هێزەکانمان توانیان گروپێکی دزی نەوت و کونکردنی بۆری نەوتی هەرێمی کوردستان لە سنووری پارێزگای هەولێر، ناحیەی قوشتەپە، گوندی دۆڵەزە دەستگیربکەن.
تاوانباران راستەوخۆ لەکاتی ئەنجامدانی تاوانەکە دەستگیرکران کە پێک هاتبوون لە 3 کەسی بە رەگەز کورد و دەست بەسەر ئۆتۆمبێلێکی تانکەر جۆری ئیسکانیا هەڵگری تابلۆی (عێراق/سلێمانی)ـیدا گیرا، کە بۆری نەوتی هەرێمی کوردستانیان کونکردبوو، لكاندبوویان به سۆندەیەکەوە، پاشان بە تانکەر نەوتەکەیان بار کردبوو.
یەکێک لە تاوانباران هەڵگری ناسنامەی بەڕێوەبەرایەتی گشتی دژەتیرۆری سلێمانییە، پەڕاوی لێکۆڵینەوەیان بۆ رێکخرا و رادەستی دادگای تایبەتمەند کران.
هاووڵاتیانی هەرێمی کوردستان دڵنیا دەکەینەوە کە هێزەکانمان هەمیشە لە ئامادەباشی دان بۆ رێگریکردن لە دزینی سەرچاوەی داهات و سامانی ئابووری هەرێمی کوردستان.
