وەزارەتی ئەوقاف لەبارەی دامەزراندنی کوڕەکانی عەبدوللەتیف سەلەفی ڕونکردنەوە دەدات
لڤین:
وەزارەتی ئەوقافی هەرێم رایگەیاند، دوو کوڕەکەى عەبدولـلەتیف سەلەفى بەشێوەى گرێبەست و بەکاتى لەشوێنى دوو کەس دانراون کە بەویستی خۆیان وازیان ھێناوە.
دوای ئەوەی ئاشکرا کرا کە دوو کوڕی عەبدوللەتیف ئەحمەد، ریبەری بەشێک لە سەلەفیەکانی هەرێمی وکردستان لە وەزارەتی ئەوقاف دامەزرێندراون وەزارەتی ئەوقاف ڕوونکردنەوەیەکی بڵاوکردەوە.
وەزارەتەکە لەراگەیەنراوێکدا ئاماژەى بەوەکردووە، لەئێستادا ھیچ دامەزراندنێکی نوێ لەحکومەتی ھەرێمی کوردستان بۆھیچ کەسێک نیە
دەشڵێت: ئەوەی کە ھەیە ( گرێبەستە) بەکاتی لە (جێگادانان) ئەویش بەھۆی وازھێنان یان دابرانی کارمەندێکی گرێبەستەوە دەبێت بەھەمان بروانامە، ئەو دوو بەڕێزەی ناویان ھێنراوە لەجێگای دووکەس دانراون کە بەویستی خۆیان وازیان ھێناوە، بە پێی مەرج و رێنمایی گرێبەستیان بۆ کراوە.
ئاماژەی بەوەشکردووە: ئەم لەجێگادانانەی کارمەندی گرێبەست، بەپێى پێویست بەشێوەی کاتی لەھەموو وەزارەتەکان بەردەوام پەیرەو دەکرێت، بۆ بەرچاو روونی لە ماوەی ساڵی رابردوو تا ئێستا (شەست) حالەتی لە جێگادانان لە وەزارەتمان کراوە ، ئەم پرۆسەیەش بەردەوام دەبێت بەپێی رێنماییە کارگێریەکان .
