گۆڕان: ئامادەکارییەکانی دووەم کۆنفڕانسى نیشتمانى گەیشتوونەتە قۆناغی کۆتایی

لڤین:

لیژنەى باڵاى دووەم کۆنفڕانسى نیشتمانی بزوتنەوەى گۆڕان رایگەیاند،  کارەکانى لیژنەى باڵا چڕ کراوەتەوە بۆئەوەى کۆنفرانسى نیشتمانى لە وادەى دیاریکراوى خۆیدا ببەسترێت و ببێتە وەڵامگۆى داخوازییەکانى گۆڕانخوازان و هاونیشتمانیان و قۆناغى ئێستاى بزوتنەوەى گۆڕان،

ئەمڕۆ لیژنەى باڵاى دووەم کۆنفڕانسى نیشتمانیی گۆڕان کۆبوەوە، لەبارەى ناوەڕۆکى کۆبونەوەکەش یاسین حەمە عەلى، سکرتێرى لیژنەى باڵاى کۆنفڕانس بەمیدیای حزبەکەی راگەیاند “هەوڵ و کارەکانمان چڕ کردوەتەوە، کۆبونەوەى ئەمڕۆشمان بۆئەوەبوو کە بەدواداچوون بکەین بۆ کارى لیژنەتایبەتمەندەکان بەتایبەت کە ئێمە شەش لیژنەمان هەیە و پێویستە هەر یەکەیان راپۆرتێکى رەشنوسى ئامادەکراوى هەبێت بۆ بەردەم کۆنفرانس، ئێستا کارى چوار لەو لیژنانە بە کۆتا گەیشتوە و ئامادەیە و دو لیژنەشیان (80%)ى کارەکانیان تەواو کردوە.”

ئاماژەی بەوەشکردووە “وەک لیژنەى باڵاى دووەم کۆنفرانسى نیشتمانى ئەمڕۆ نەخەشەرێگایەکمان داڕشتووە بۆئەوەى لە رۆژانى داهاتودا کۆبونەوەى چرمان هەبێت لەگەڵ دەستەى هەماهەنگى بۆ ئەنجامدانى کۆنفڕانسى نیشتیمانى، هەمو هەوڵێکى خۆمان دەدەین بۆئەوەى لەدوادەى دیاریکراودا کۆنفرانس ببەستین و بەشێوەیەکیش بێت کە ببێتە وەڵامگۆى سەرجەم گۆڕانخوازان و هاونیشتیمانیان و لە ئاستى پێویستى ئەم قۆناغەى بزوتنەوەى گۆڕاندا بێت.”