حەوت ئەندامی داعش لە کەرکوک دەستگیرکران
لڤین:
هێزە ئەمنییەكانی عیراق لە كەركوك حەوت ئەندامی داعشیان دەستگیركرد، كە پێشتر لەلایەن دادگاكانی عیراقەوە بە ماددەی چواری تیرۆر فەرمانی دەستگیركردنیان هەبووە.
شانەی راگەیەندنی ئەمنیی سەر بە فەرماندەیی ئۆپەراسیۆنە هاوبەشەكانی عیراق، لە راگەیەندراوێكدا بڵاویكردەوە، هێزەكانی دەزگای ئاسایشی نیشتمانیی كەركوك، پشت بەستن بە زانیاری هەواڵگری، لەچەند ناوچەیەكی ئەو پارێزگایە، حەوت تیرۆریستیان دەستگیركرد.
ئاماژەی بەوەشکردووە ئەو کەسانەی دەستگیرکراون پێشتر چەكدار بوون لەهەردوو ویلایەتی كەركوك و نەینەوای رێكخراوی تیرۆریستی داعش.
بەگوێرەی راگەیەندراوەكە، سەرجەم دەستگیركراوەكان، كە لەلایەن دادگاكانی عێراقەوە بە ماددەی چواری تیرۆر داواكراو بوون، رادەستی لایەنی پەیوەندیدار كران، بەمەبەستی دادگایی كردنیان.
