دوو فیلمی بەشداربووی فێستیڤاڵی فیلمی سلێمانی کشانەوە

لڤین:
دوو فیلمی بەشداربووی پێنجەمین فێستیڤاڵی فیلمی سلێمانی بە فەرمی لە فێستیڤاڵەکە پاشەکشەیان کرد بە هۆی ئەوەی یەکێک لە فیلمەکان نمایشکردنی ڕەتکراوەتەوە.
کۆمینی فیلمی ڕۆژئاوای کوردستان بەرامبەر قەدەغەکردنی نمایشکردنی فیلمی “ژ بۆ ئازادیی” لە پێنجەمین فێستیڤاڵی فیلمی سلێمانی، بریاریدا هەردوو فیلمەکەیان کە بریتین لە “وەرزی تووتڕک” و “ژ بۆ ئازادیی” بەفەرمیی لە فێستیڤاڵەکە بکشێننەوە.
هەر چەندە بڕیاربوو فیلمی ژبۆ ئازادی شەوی ڕابردوو نمایش بکرێت، بەڵام بەڕێوەبەرانی فێستیڤاڵەکە ڕایانگەیاند بەهۆی ئەوەی بەرهەمهێنانی فیلمەکە بۆ پێش ساڵی 2019 دەگەرێتەوە پەخشکردنی لەو کاتەدا ڕادەگیرێت.
فیلمی وەرزیتوتڕک دوای نیوەڕۆی دوێنێ نمایشکرا، بەڵام نیوەڕۆی ئەمڕۆ کۆمینی فیلمی ڕۆژئاوای کوردستان ڕاگەیەندراوێکی لەبارەی قەدەغەی نمایشکردنی فیلمی “ژ بۆ ئازادیی” لە پێنجەمین فێستیڤاڵی فیلمی سلێمانی بڵاوکردەوە.
کۆمینی فیلمی ڕۆژئاوا دەڵێت: نە هیچ پاساوێکی ڕاست لەسەر ئەو قەدەغەکردنە بەئێمە درا، نە ڕێکخەرانی فێستیڤاڵەکەش هیچ ڕاگەیەندراوێکی فەرمییان لەوبارەیەوە بڵاوکردەوە، بۆیە ئێمە دەمانەوێت هەموو ڕاستیی و پەرەسەندنەکانی ئەو بابەتە بڵاوبکرێنەوە.