محەمەد حاجی مەحمود:پێ ئەچێت ئەو موهەندیسانە قبوڵ خاس بن و شارەزایان نەبێ لە کاری بیناسازی و ئاوو ئاوەڕۆ

لڤین:

پاش ئەوەی سەر لە بەیانی ئەمڕۆ ( ١٧ی کانوونی یەکەمی ٢٠٢١ ) بەهۆی بارینی بارانێکی زۆرەوە لە بەشێک لە گەڕەکەکانی شاری هەولێر لافاو دروست بوو بوە هۆی گیان لەدەستدای ١٢ هاوڵاتی و زەرەر و زیانێکی زۆری گەیاند بە هاوڵاتیانی ئەو گەڕەکانە، محەمەد حاجی مەحمود سکرتێری حزبی سۆسیالیست دیموکرات، سەبارەت بە زیانەکانی ئەو باران و زریانە بابەتێکی لە هەژماری فەرمی خۆی بڵاوکردەوە.

‎دوێنێ شەو 16-12-2021 باران بارینی بەهێز بووە هۆی لافاو لە هەولێر و ژمارەیەک گەڕەک و گوند بە هۆی خراپی پڕۆژەکان و نەبوونی کەسانی شارەزا و ڕێکخستنی و پاراستنی هاوڵاتیان، زیانێکی زۆری مادیان کرد و چەند هاوڵاتیەکیش گیانیان لە دەستدا، ئەوانە نەکەوتونەتە بەحرەوە بەڵکوو لە ماڵەکانی خۆیاندا خنکاون.

‎لێرەوە داوا لە لایەنی پەیوەندیدار دەکەین لە هەولێر کە چاودێری پڕۆژەکان بکەن بە نیشتەجێبونیشەوە وە خاوەن پڕۆژەکان ئەوەندەی خەمی دەستکەوت و کۆکردنەوەی سەرمایە نەبن لەسەر حسابی خەڵکی بەڵکو کەمێکیش خەمی هاوڵاتیانیان هەبێت، پێ ئەچێت ئەو موهەندیسانە قبوڵ خاس بن و شارەزایان نەبێ لە کاری بیناسازی و ئاوو ئاوەڕۆ یان بۆ سودی خۆیان ڕاڕەوی ئاوەکە ئەگۆڕن بۆ چەند پارچە زەویەک، بۆیە داوا لە حکومەتی هەرێمی کوردستان ئەکەم لە ڕێگای لایەنی پەیوەندیدار چارەسەری ئەم گرفتە بکەن چون، کێشەمان کەم نییە وا کێشەی لافاوەیشی بێتە سەر.

‎ خەڵکی کوردستان، لەلایەک خەمی داعش و موچە و ململانێی حزبەکان و هێرش و بۆردومانی وڵاتان و حەشدی شەعبی و دەرکردنی هاوڵاتیان لە زێدی باو باپیرانیان هەبێ لەناوچە دابڕاوەکان لە لایەکی ترەوە چ دکتوری قبوڵ خاس دەستی هەیە لەتەندروستی خەڵکی و نەشتەرگەری هەڵە ئەکات و سوڵحی عەشایەری ئەکات چ مهەندیسی قبوڵ خاس دەستی هەیە لەو بینایانەی کەوا هەرەس دەهێنێ و بەسەر خەڵکی هەژارو داماودا دەڕمێ.

‎بۆیە خەڵکی ئێستاکە هەر هەورێک بێت لەماڵەکەی خۆشی دەترسێت لە لافا، بۆیە ئەبێت حکومەت ئاگای لێبێت چوونکە ئەو ڕوداووەی دوێنێی هەولێر بە فاتیحەیەک و خێر پێ کردنە برینی ئەو ئافرەتە مامۆستایە و دایکی و نەنکی ساڕێژ ناکات بۆ کەسوکاری.

‎جارێکی کە هاوخەمی خۆمان دەەردەبڕین بۆ کەس و کارو خانەوادەی قوربانیانی لافاوەکەو هیوای چاکبونەوەش بۆ ئەوانەی بریندار بوون بەهۆی لافاوەکەوە، لە خوای گەورە داواکارین ئەمە دوا ڕوداوو بێ بەسەر خەڵکی کوردستان

‎محەمەد حاجی مەحمود

۲٠۲۱/۱۲/۱۷

بابەتی پەیوەندیدار

Back to top button