پارێزگاری هەولێر هۆشداری دەدات بە هاوڵاتیان

لڤین:

پارێزگای هەولێر ڕایگەیاند، بەهۆی بارانبارین و لافاوەکەی بەرەبەیانی ئەمڕۆ زیانێکی زۆری گیانی و ماددی کەوتووەتەوە و داوا لە هاوڵاتیان دەکات زۆر زه‌روور نه‌بێت ڕێگاكانی ده‌ره‌وه‌ و ناوه‌وه‌ی هه‌ولێر به‌كار نه‌هێنن.

پارێزگای هەولێردا لە ڕاگەیەندراوێکدا دەڵێت “درەنگانێکى ئەمشەو لە ئەنجامی یەکگرتنی دوو نزمە پاڵەپەستۆی دەریای ناوەراست و دەریای سور کە بووە هۆى دروست بوونى شەپۆلێکی بەخورى باران لە شاری هەولێر و له‌ نزیک كاتژمێر 4ی به‌یانیه‌وه‌ لافاو له‌ بەشێکى زۆرى سنووری پارێزگای هه‌ولێر دروست بوو و بەداخەوە جگه‌ له‌ زیانی ماددی زیانی گیانیشى لێکەووتەوە.”

پارێزگاری هەولێر دەشڵێت “داواکارین لە هاوڵاتییان ئه‌گه‌ر بۆ كاری زۆر زه‌روور نه‌بێت ڕێگاكانی ده‌ره‌وه‌ و ناوه‌وه‌ی هه‌ولێر به‌كار نه‌هێنن، هەروەها لە سنوری سەرجەم ناحیە و قەزا و گوندەکانى هەولێر لە هەرشوێنێک هەستیان بەمەترسى بەرزبوونەوەى ئاو و کاریگەریەکانى باران کرد ڕاستەوخۆ پەیوەندى بە قائیمقام و بەڕێوەبەرى ناحیە و شارەوانى و لایەنە بەرپرسەکانى ئەم شوێنانەوە بکەن”.

ئاماژەی بەوەشکردووە کە “پێشبینی دەکرێت ئەمڕۆ جارێکى تر شەپۆلێکی بەخورى باران سنورى پارێزگاى هەولێر بگرێتەوە. بۆ ئەو مەبەستەش سەرجەم تیمەکانى دەزگاکانى (ئاسایش، پۆلیس، زێرەڤانی، هاتوچۆ، تەندروستى، بەرگرى شارسانى، شارەوانیەکان، ناوەندى قەیرانەکانى پارێزگا) و سەرجەم دەزگا پەیوەندیدارەکان خراونەتە ئامادەباشییەوە”.

دەشڵێت: مەسرور بارزانى، سەرۆکى حومەتى هەرێمى کوردستان بەووردى چاودێرى دۆخەکە دەکات و چه‌ند جارێک لەڕێگەى پەیوەندى تەلەفۆنیەوە پارێزگارى هەولێرى ڕاسپاردووە لەڕێگە دەزگا پەیوەندیدارەکانەوە بە پەلە بە ھانای زیانلێکەوتووانەوە بچن و ھەرچی پێویست بێت بۆ ھاوکاریکردنیان و دابینکردنی پێداویستییەکانیان ئەنجامی بدەن.