مسعود بارزانی داوای تۆڵەی خوێنی شەهیدەكانی قه‌ره‌چوغ دەکات زووترین كات
لڤین:
سه‌رۆكی پارتی دیموكراتی كوردستان به‌زوترین كات تۆڵه‌ی خوێنی ئه‌و كه‌سانه بكرێته‌وه كه دوێنێ شه‌و له هێرشی داعشدا له سه‌رگه‌ڕان و قه‌ره‌چوغ شه‌هیدبوون.
شەوی رابردوو تیرۆریستانی داعش، پەلاماری گوندی خدر جیجەی بناری چیای قەرەچوغیان دا، لەو پەلامارە دڕندانەیەدا، کوێرانە کەوتنە دەستڕێژی کردن لە خەڵکی سڤیلی گوندەکە، لە ئەنجامدا سێ ھاوڵاتی شەھید بوون و ژمارەیەکیش بریندار بوون.
دواتر ھێزی پێشمەرگە ئۆپەراسیۆنێکی کێوماڵکردنی بۆ ناوچەکە ئەنجامدا، لەوکاتەدا، یەکێک لە ئۆتۆمبێلەکانی پێشمەرگە کەوتە بۆسەی تیرۆریستانی داعشەوە، بەداخەوە حەوت پێشمەرگە شەھید بوون.
لە ئەنجامی هێرشێکی داعش ١٠ کەس گیانیان لە دەستدا
مسعود بارزانی سه‌رۆكی پارتی دیموكراتی كوردستان، لە پەیامەکەیدا لە بارەی هێرشەکانی داعش لە قەرەچوغ ڕایگەیاندووە،” ئیجرائاتی پێویست وەربگیرێت لەبەرانبەر هەر جۆرە كەمتەرخەمییەك”.
ده‌قی په‌یامه‌كه‌ی:
بەناوی خودای مەزن و دلۆڤان
بە داخێكی زۆرەوە لە ئەنجامی پەلاماری وەحشیانەی تیرۆریستانی داعش لە شەوی ڕابردوو لە ناوچەی سەرگەڕان و قەرەچوغ ژمارەیەك هاووڵاتی مەدەنی و پێشمەرگە شەهید و بریندار بوون. پرسە و سەرەخۆشی خۆم ئاراستەی خانەوادە و كەسوكاری سەربەرزی شەهیدانی ئەو كردەوە تیرۆریستیە دەكەم و خۆم بە هاوبەشی خەمیان دەزانم. لە خودای مەزن داواكارم گیانی پاكی شەهیدەكانمان بە بەهەشتی بەرین شاد بكات و سەبر و دڵنەوایی بە كەسوكار و بنەماڵەكانیان ببەخشێت و هیوای شیفا و چاكبوونەوە بۆ برینداران دەخوازم.
سەرەخۆشی لەو شێرەژنە قارەمانە دەكەم كە سێ كوڕی لە ئەنجامی پەلاماری شەوی ڕابردووی تیرۆریستان گەییشتنە كاروانی نەمران و شەهیدبوون و، لە خودای گەورە داواكارم سەبر و ئارامی پێ ببەخشێت. گوتەكانی ئەو شێرەژنە بۆ هەموومان مایەی ورە و پێداگری و بەردەوامبوونە لەسەر ڕێباز و قەزییە باڵاكانی گەلەكەمان و، لە دڵەوە سوپاسی دەكەم.
ئەوەش ڕادەگەیێنم كە لەپێناو پاراستن و بەرگری لە خاك و نیشتیمانمان، پێویستە پێداچوونەوە و وردبینی زیاتر بە كاروباری هێزەكانی پێشمەرگە و هێڵە بەرگرییەكاندا بكرێت و ئیجرائاتی پێویستیش وەربگیرێت لە بەرانبەر هەر جۆرە كەمتەرخەمییەك. پێویستە بە زووترین كاتیش تۆڵەی خوێنی شەهیدەكانمان لە دوژمن بكرێتەوە.
هەزاران سڵاو لە گیانی پاكی شەهیدانی شەڕی دژی داعش و هەموو شەهیدانی ڕێگەی ئازادیی كوردستان.
مسعود بارزانی
3ی كانوونی یەكەمی 2021
