حکومەتی هەرێمی کوردستان داوای کاراکردنی سەنتەرەکانی ئەمنی هاوبەش لە عیراق دەکات
لڤین:
درەنگانێکی شەوی ڕابردو،تیرۆریستانی داعش لە پەلامارێکی ترسنۆکانەدا، پەلاماری خاڵێکی پاسەوانی هێزەکانی پێشمەرگەی لیوای ٥ی پیادەیان لە تەپکی (کەڵان) لەسنوری کوڵەجۆ دا، بەداخەوە، چوار پێشمەرگە بریندار بوون، هێزەکانی پێشمەرگە، بەتوندی بەرپەرچی پەلامارەکەیان دایەوە، لە کاتی چون بەهانای ئەو پێشمەرە بریندارانەوە مینێکی چێندراو تەقیەوە بە ئۆتۆمبیلێکی هێزەکانی پێشمەرگە لە ئەنجامدا پێنج پێشمەرگە شەهید بوون.
حکومەتی هەرێمی کوردستان سەبارەت بەو ڕوداوە راگەیەنراوێکی بڵاوکردەوە.
دەقی ڕاگەیەندراوەکە:
شەوی ٢٧ لەسەر ٢٠٢١/١١/٢٨، لە ناوچەی تەپی تەڵانی سنووری کوڵەجۆ، بۆمبێکی چێندراوى تیرۆرستانی داعش بە ئۆتۆمبێلێکی ھێزی پێشمەرگەدا تەقییەوە، و بەو هۆیەوە پێنج پێشمەرگە شەهید بوون و چوار دیکەش بریندار بوون.
حکومەتی هەرێمی کوردستان چەندین جار حکومەتی فیدڕاڵی ئاگادارکردۆتەوە لەو بۆشاییە ئەمنییە کە لە ناوچە کوردستانییەکانی دەرەوەی ئیدارەی هەرێمدا هەیە کە بەھۆیەوە ئەو رێکخراوە تیرۆرستییە توانیویەتی ئەو دەرفەتە بقۆزێتەوە و لەو ناوچانە خۆی رێکبخاتەوە و ، ببێتە ھەڕەشە بۆسەر دانیشتوانی ناوچەکە.
حکومەتی هەرێمی کوردستان جەخت لەسەر هەرچی زووی کارا کردنەوەی سەنتەری هاوبەشی ئەمنی نێوان هێزەکانی پێشمەرگە و سوپای عێراق دەکاتەوە.
لێرەوە پرسە و سەرەخۆشى خۆمان ئاراستەی بنەماڵەی شەهیدە سەربەرزەکان دەکەین و هیواى زوو چاکبوونەوەش بۆ پێشمەرگە بریندارەکان دەخوازین.
د. جوتیار عادل
وتەبێژى حکومەتی هەرێمی کوردستان
٢٨ی تشرینی دووەمی ٢٠٢١
