لەبارەی سوتەمەنیەوە وەزارەتی سامانە سروشتییەکان بڕیارێکی دەرکرد

لڤین:

وەزارەتی سامانە سروشتییەکانی هەرێم، لە 4ی ئەم مانگەوە بڕیاردراوە بە رێگەپێدانی هاوردەکردن و هەناردەکردنی تەواوی بەرهەمە نەوتییەکان، پاشماوەی نەوتی و  ماددە کیمیاییەکان، هەروەها رێگەپێدانەکانی تایبەت بە کۆمپانیاکانی نەوت و گازی نێودەوڵەتی تەنها بە رەزامەندی وەزیر دەبێت. 

لە نوسراوێکدا کە واژۆی کەمال ئەتروشی، وەزیری سامانە سروشتییەکانی لەسەرە،وەزارەتی سامانە سروشتییەکانی هەرێمی کوردستان،ڕایگەیاندوە،” بڕیاردراوە بە رێگەپێدانی هاوردەکردن و هەناردەکردنی تەواوی بەرهەمە نەوتییەکان، پاشماوە نەوتییەکان و ماددە کیمیاوییەکان”.

لە بەشێکی تری نوسراوەکەدا هاتوە،” هەر رێگەپێدانێکی دیکە کە تایبەتە بە گواستنەوەی کەل و پەل و پێداویستییەکانی کۆمپانیاکانی نەوت و گازی نێودەوڵەتی و خزمەتگوزارییەکانی، تەنها بە رەزامەندی وەزیر دەبێت بەپێی رێنماییە کارپێکراوەکانی وەزارەت”.

جێگەی ئاماژە پێدانە، ماوه‌ی زیاتر له‌ دو هه‌فته‌یه‌ نرخی به‌نزین له‌ به‌نزینخانه‌كانی هه‌رێمی كوردستان به‌رده‌وام رو له‌به‌رزبونه‌وه‌یه‌ و تا ئێستاش حكومه‌تی هه‌رێمی كوردستان، هیچ هه‌نگاوێكی كرداری له‌وباره‌یه‌وه‌ نه‌گرتوه‌ته‌به‌ر.