قوباد تاڵەبانی: سەقامگیری هەرێمی کوردستان هێڵی سوورە

لڤین:

قوباد تاڵەبانی، ڕایدەگەیەنێت، پاراستنی ئاسایش و سەقامگیری هەرێمی کوردستان هێڵی سوورە و لە هیچ کەس و لایەنێک قبوڵ ناکرێت بیخاتە مەترسییەوە و هێرشەکەی شەوی ڕابردووش زەنگێکی وریاکردنەوەیە بۆ هەموولامان.

قوباد تاڵەبانی، جێگری سەرۆکی حکومەتی هەرێمی کوردستان، سەبارەت بە هێرشە موشەکییەکەی شەوی ڕابردوو بۆ سەر هەولێر، لە لاپەڕەی فەیسبوکی خۆی پەیامێکی بڵاوکردەوە.

لە پەیامەکدا هاتووە: “بەداخەوە شەوی ڕابردوو هێرشکرایەسەر هەولێری پایتەخت و ژمارەیەک قوربانی لێ کەوتەوە.

پاراستنی ئاسایش و سەقامگیری هەرێمی کوردستان هێڵی سوورە و لە هیچ کەس و لایەنێک قبوڵ ناکرێت بیخاتە مەترسییەوە”.

قوباد تاڵەبانی، هەروەها ئاماژەی بۆ ئەوە کردووە “ئەم ھێرشە‌ش زەنگێکی وریاکردنەوەیە بۆ هەموولامان، بۆ ئەوەی یەکڕیز و یەکدەنگ بین لە‌ رووبەڕووبوونەوەی مەترسییەکان، هەروەها ئەم رووداوە و پێشینەکانی دەریانخست کە دەبێت حکومەتی فیدرال و حکومەتی هەرێم هەماهەنگی زیاتر بکەن بۆ نەهێشتنی بۆشایی ئەمنی لە ناوچە جێ ناکۆکەکان و پڕکردنەوەی درز و کەلێنەکان”

هەروەهاداواشیکردووە “کۆمەڵگای نێودەوڵەتی و وڵاتانی هاوپەیمانیش پێویستە ئەم مەترسیانە بە جددی وەربگرن و یارمەتیدەرمان بن بۆ بنەبڕکردنی تیرۆر و سزادانی گروپە لە یاسا دەرچووەکان”.

بابەتی پەیوەندیدار

Back to top button