یەکێتی: ئەنجامی هەڵبژاردنی هەولێر رەتدەکەینەوە
لیژنەی باڵای هەڵبژاردنەکانی یەکێتی لە هەولێر رایگەیاند، ئەنجامەکانی هەڵبژاردن رەتدەکەنەوە و بەڵگەیان لایە کە ئەنجامەکان بە “ئەلیکترۆنی” لە بەرژەوەندی لایەنێکی دیکەی سیاسی دەستکاری کراون، ئەنجامەکان لەنێوان دوێنێ و ئەمڕۆ جیاوازن بۆیە لەئێستادا سکاڵایان تۆمارکردوە.
مەجید حەمەدەمین، ئەندامی سەرکردایەتی یەکێتی لەکۆنفرانسێکی رۆژنامەنیدا رایگەیاند: لیژنەی باڵای هەڵبژاردنەکانی یەکێتی لەپارێزگای هەولێر ئەنجامە بڵاوکراوەکانی هەڵبژاردن لەپارێزگاکەدا رەتدەکاتەوە، چونکە سەرجەم ئەنجامەکانی هەڵبژاردن کە لەئێستادا بڵاوکراونەتەوە و دەنگی راستەقینە نین و دەستکاری کراون.
ئاماژەی بەوەشکرد، لەکۆمسیۆنی باڵای سەربەخۆی هەڵبژاردنەکان سکاڵایان تۆمارکردوە و باوەڕیانوایە بە دەستکاریکردنی سیستەمی “ئەلیکترۆنی” هەڵبژاردنەکان دەنگی کاندیدانی یەکێتی لە بەرژەوەندی لایەنێکی دیکەی سیاسی کەمکراونەتەوە.
وتیشی: لەکاتی گواستنەوەی سندوقەکانی دەنگدان هێزی چەکدار لەنزیک بنکەکان جێگیرکراون، بۆیە لەنێوان دوێنێ و ئەمڕۆدا ئەنجامەکانی دەنگدان دوو ئەنجامی جیاوازبون.
راشیگەیاند: داوایان لەکۆمسیۆنی هەڵبژاردنەکان کردوە دووبارە بژاردنەوەی دەنگەکانی بازنەکانی سنوری پارێزگای هەولێر بەدەست ئەنجام بدات، چونکە “ئێمە لەسنوری بازنەی یەکی هەولێر گەورەترین گلەییمان هەیە کە کاندیدەکەمان 28000 دەنگی بەدەستهێناوە و لەپلەی سێیەمدایە، بۆیە تەحەدا دەکەین بابێن بیژمێرنەوە بزانن کاندیدەکەی ئێمە رەقەم سێیە یان رەقەم چوارە، ئەو تەحەدایەشمان قبوڵە”.
