حکومەتی هەرێمی کوردستان پەیامێکی بڵاوکردەوە

لڤین:

حکومەتی هەرێمی کوردستان، گرنگە حکومەتی عێراق، ئەرک و بەرپرسیاریەتیی خۆی بەرانبەر بە کەسوکاری قوربانییان جێبەجێ بکات و قەرەبووی ماددیی و مەعنەوییان بکاتەوە.

لە ڕاگەیەندراوێکدا کە فەرمانگەی میدیا و زانیاری حکومەتی هەرێمی کوردستان بڵاوی کردوەتەوە، حکومەتی هەرێمی کوردستان بە بۆنەی ساڵیادی ئەنفالی بادینانەوە بڵاوی کردوەتەوە، ڕایگەیاندوە،” لەدوا قۆناغی جێنۆسایدی ئەنفال و ٣٣ ساڵ بەر لە ئێستا، دەڤەری بادینان قوربانییەکی دیکەی گەورە تاوانەکانی ڕژێمی بەعسی ڕووخاو بوو کە هەزاران کەسی بێتاوانی، شەهید و بێسەروشوێن و ئاوارە بوون و سەدان گوندیشی خاپوور کران”.

لە ڕاگەیەندراوەکەی حکومەتی هەرێمدا هاتوە،” ئەنفال کە تاکە ڕێگەیەکی دیکتاتۆریەتی بەعس بوو بۆ مانەوەی خۆی و لەنێوبردنی بزاڤی ڕزگاریخوازی کورد لە باشووری کوردستان، خەون و خەیاڵێک بوو کە نەهاتەدی و هەرگیز بۆ هیچ کەسی دیکەش نایێتە دی”.

هەروەها هاتوە،” ئێستا کە یادگار و پاشینان و نەوەی شەھیدە سەربەرزەکانی ئەنفال، سەرقاڵی بنیاتنان و ئاوەدانکردنەوەی کوردستانن، شکۆدارانە یادی قوربانی و شەهیدەکانمان دەکەینەوە و گرنگە حکومەتی فیدراڵی عێراقیش ئەرک و بەرپرسیاریەتی خۆی بەرامبەر بە کەسوکاری قوربانیان جێبەجێ بکات و قەرەبووی ماددی و مەعنەوییان بکاتەوە”.

ئاماژە بەوەیشدراوە،” حکومەتی هەرێمی کوردستانیش وەک هەمیشە خزمەتی زیاتری کەسوکاری سەربەرزی شەهیدان و ئەنفالکراوان دەکات و بە ئەرکی خۆی دەزانێت خزمەتگوزاریی زیاتر بگەیێنێتە هاونیشتمانیانی خۆشەویستی هەرێمەکەمان”.