بڕیاردرا نرخی نان گۆڕانکاری بەسەردا نەیەت

لڤین:

نوێنەری نانەواخانەکان و سەندیکای کرێکاران لەگەڵ قائیمقامی سلێمانی کۆبونەوەو گفتوگۆیان لەبارەی کێشەی نانەواخانەکان کرد رێککەوتن نرخی نان وەکو خۆی بمێنێتەوە و ژمارەی نان دەستکاری نەکرێت.

دوایە ئەوەی ژمارەیەک لە خاوەنی نانەواخانەکان وچالاک رەئوف، سەرۆکی لقی سلێمانی یەکێتی سەندیکاکانی کرێکارانی کوردستان لەگەڵ ئاوات محەمەد، قائیمقامی سلێمانی کۆبونەوە باسی کێشەی نانەوا و سەمونخانەکانیان کرد.

قائیمقامی سلێمانی پێی راگەیاندن ئێمە لە کێشەکانی ئێوە تێدەگەین و دەزانین بەشێکی گرنگی کۆمەڵگە و شارەکەمانن و زەرەرمەندی یەکەم ئێوەن، لە چەند لایەکەوە هەوڵێکی زۆرمان بۆ چارەسەری کێشەکان داوە، ئومێد دەکەین لە ئایندەدا ئەنجامەکەی ببینین.

ئاوات محەمەد وتیشی: رێگە نادەین بەهیچ جۆرێک ئارد ببرێتە دەرەوە، لە هاتنەناوەوەشدا هەوڵ ئەدەین رسوماتی لەسەر نەبێت، دەزانم هەمووتان لە زەرەردان، بەڵام با هەوڵ بدەین بە هەموومان رێگە بگرین لە گرانبوونی نرخی نان، چونکە دواجار شارەکەمان و کۆمەڵگەکەمان زیان دەکات.

لە کۆبونەوەکەدا رێککەوتن کە لەپێناو بەرژەوەندی هاوڵاتیاندا نرخی نان وەکو خۆی بمێنێتەوە و ژمارەی نان دەستکاری نەکرێت و  نان بە هەزار دینار دەبێت و خاوەنی نانەواخانەکانیش رەزامەند بوون.