وەزارەتی بەرگری توركیا هێزەکانمان دابەزیونەتە سەر چیای گارە

لڤین:

وەزارەتی بەرگری توركیا، ڕایگەیاند، ئۆپەراسیۆنییان لە سەر چیای گارەی دەڤەری بادینان دەستپێکردوە و هێزەکانیان دابەزیونەتە سەر چیاکە، بەپێی زانیارییەکانیش گەریلاکانی پەکەکە ڕووبەڕووی سەربازەکان بوونەتەوە و لە ئێستادا شەڕی قورس لە ئارادایە.

وەزارەتی بەرگری توركیا، لە ڕاگەیەنراوێكدا ئاشكرایكرد، لە بەیانی ئەمڕۆوە سوپای توركیا ئۆپەراسیۆنێكی گەورەیان بۆ سەر چیای گارە دەستپێكردووە و ڕایگەیاندووە کە هێزەکانیان لە سنوری چیای گارە دابەزاندووە.

ئەوەش لە کاتێکدایە کە لە بەرەبەیانی ئەمڕۆوە هێلیکۆپتەر و فڕۆكە جەنگییەكانی توركیا بۆردومانێكی چڕی چیای گارەیان لە سنوری شارۆچكەی ئامێدی لە دەڤەری بادینان لە پارێزگای دهۆك کرد.

بەو پێیەش دوابەدوای ئەوە هێزی سەربازی تورکیا لە ئاسمانەوە بە فڕۆكە دابەزێندراونەتە سەر چیاکە، تا ئێستا هێزەكانی پاراستنی گەل – هەپەگە، لەبارەی ئەو ئۆپەراسیۆنەی تورکیاوە هیچ زانیارییەکی بڵاو نەکردوەتەوە.

بەڵام میدیاکانی نزیک لە پەکەکە، کەمێک پێش ئێستا بڵاویانکردەوە، کە سوپای تورکیا ژمارەیەکی زۆر لە سەربازەکانی لە مەیدانی سیانەی چیای گارە دابەزاندووە، بەڵام هێزەکانی گەریلا وەڵامی هێرشەکەیان داوەتەوە و هێلیکۆپتەرەکان بە ناچاریی ناوچەکەیان بەجێبهێشتووە و لەنێوان سەربازانی سوپای تورکیا و گەریلاکان شەڕێکی قورس دەستپێکردووە و تائێستا بەردەوامە.