گروپی کۆمپانیاکانی قەیوان داوای یاسایی دژی پەرلەمانتارێک تۆمار دەکات

لڤین:

گروپی کۆمپانیاکانی قەیوان، ناچارین ڕێگای دادگا و یاسا لەبەرامبەر ئەو ناوزڕاندنەی بەڕێزیان بگرێته‌به‌ر. داواکارین لەبەڕێزیان له‌ دادگا بەڵگەکانی خۆی بخاتە ڕوو.

پاش ئەوەی ڕۆژی ڕابردو ( پێنج شەممە، ١٩ی ئابی ٢٠٢١ ) غالب محمد عەلی، ئەندامی ئەنجومەنی نوێنەرانی عێراق، لە هەژماری فەرمی خۆی لە تۆڕی کۆمەڵایەتی فەیس بووک بابەتێکی بڵاوکردەوە و ڕایگەیاند،”

كۆمپانیای قەیوان ، مادەی نەفتای لە حكومەتی عیراق بە داشكاندنی (١٢٠) دۆلار لە هەر تەنێك وەرگرتوە بۆ ئەوەی لە ڕێگەی مەرزەكانەوە بۆ دەرەوەی وڵات ببرێت، بەڵام كۆمپانیای قەیوان دێت بە مادەی چاككەروە و تەێكەڵكردنی لە گەڵ بەنزین دواتر وەك بەنزین بە هاوڵاتیانی كوردستان دەفڕۆشێت بەمەش خەڵكی هەڕێمی كوردستان دوو جار زەرەرمەند دەبن :

یەكەم : ئەمە هۆكاری سەرەكیە بۆ بڵاوبوونەوەی نەخۆشی شێرپەنجە لە سلێمانی و دەوروبەری

دوەم : دەبێتە هۆكاری كەمكردنی ئەو بەنزینەی كە هاوڵاتیان دەیكڕن بەتایبەت لەوەرزی هاویندا بە ڕێژەی ٢٠٪؜ كەم دەكات و هەر وەها بەنرخێكی گران ، هەروەها دەبێتە هۆی خراپكردنی فیتپەمپ و مەكینەی ئۆتۆمبیلەكان..

ئێمە ، حكومەتی عێراق و دەستەی نەزاهەی عێراقمان ئاگادار كردۆتەوە لەم كارەساتەی كە قەیوان و كۆمپانیاكانی ماڵی مام جەلال دروستیان كردووە بۆ خەڵكی سلێمانی …

تێبینی : دواترهەمووی بە وردی بڵاو دەكەینەوا

ئەمڕۆ ( هەینی، ٢٠ی ئابی ٢٠٢١ ) بەشی ڕاگەیاندنی گروپی کۆمپانیاکانی قەیوان روونکردنەوەیەکی بڵاوکردەوە کە ئەمە دەقەکەیەتی:

بەناوی خوای بەخشندە و میهرەبان

(و إذا حكمتم بين الناس أن تحكموا بالعدل)

ڕونکردنەوەیەک بۆ ڕای گشتی

ماوەیەکە بەڕێز (غالب محەمەد) ، لەچەند نوسین و لێدوانێکدا بێ بەڵگە و بێ پاساو تۆمەت دەخاتە پاڵ گروپی کۆمپانیاکانی قەیوان و چەند شتێک باس دەکات کەهیچ بنەمایەکی نییە ودور و نزیک پەیوەندی بەئێمەوە نییە.

لەڕابردودا و لەسۆنگەی ڕێزگرتن لەکاری پەرلەمانی و لەوباوەڕەوە کە گەر ناوبراو بەڵگەیەکی هەیە ئەوا دەتوانێ بەڕێکاری پەرلەمانی و یاسایی کاری لەسەر بکات، ئەوەش ڕێگا دروستەکەیە، بۆیە هیچ رونکردنەوە و وەڵامێکمان نەبوە. بەڵام دەرکەوت ئەوەی نەکردووەو لەڕێی سوشیال میدیاوە بەردەوامە لە ناوبردنی کۆمپانیاکەمان لەچەند بابەتێک بەبێ بەڵگە، کە وەک وتمان هیچ پەیوەندیان بەئێمەوە نییە. گروپی کۆمپانیاکانی قه‌یوان ناچاره‌ ڕێگای دادگا و یاسا لەبەرامبەر ئەو ناوزڕاندنەی بەڕێزیان بگرێته‌به‌ر. داواکارین لەبەڕێزیان له‌ دادگا بەڵگەکانی خۆی بخاتە ڕوو و ئێمەش لەوێدا بەرگری لەو ناوزڕاندنەی خۆمان دەکەین و له‌ڕێی یاساوه‌ راستیەکان بۆ هاوڵاتیانی کوردستان و سلێمانی بەتایبەتی روون ده‌بنه‌وه‌. لێرەشەوە داواکارین لەگەڵ نزیک بونەوەی هەڵبژاردن و هەڵکشانی ململانێ سیاسیەکاندا، ئێمە نەخرێینە ناو ئەم ناکۆکیانەوە، خزمەتەکانی قەیوان لە ئاوەدانیی و بوژاندنەوەی ئابوری و ژێرخانی کوردستان بەگشتی و سلێمانی بەتایبەتی کەدیار و بەرچاون کاری ئێمەیە، نەک هیچ کارێکی تر.

بەشی ڕاگەیاندنی گروپی کۆمپانیاکانی قەیوان.

 

 

بابەتی پەیوەندیدار

Back to top button