پارێزگاری سلێمانی داوای راگرتنی جوڵە لە سنوری سلێمانی دەکات

لڤین:

پارێزگاری سلێمانی رایگەیاند، رۆژی سێی ئەم مانگە بۆ ڕێزگرتن لە تەواوی قوربانییەکانی شەنگال، ماوەی پێنج خولەک جوڵە لە تەواوی سنوری پارێزگای سلێمانیدا ڕابگرن.

هەڤاڵ  ئەبوبەکر، رایگەیاند: ‎بەناوی پارێزگای سلێمانییەوە؛ داوا لە هەموو خەڵکی پارێزگای سلێمانی و تەواوی دامەزراوە دەوڵەتیی و حکومیی و ناحکومیی و سیاسیی و گشتیی و تایبەتەکان دەکەین، لە ڕۆژی سێشەممە ۳ی ئابی ۲٠۲۱، سەعات ۱٠ی بەیانی، بۆ ڕێزگرتن لە تەواوی قوربانییە شکۆمەندەکانی شەنگال و بەتایبەتیی هاوڵاتیانی جوامێری ئێزدیی، ماوەی پێنج خولەک جوڵە لە تەواوی سنوری پارێزگای سلێمانیدا ڕابگرن.

پارێزگاری سلێمانی دەشڵێت: لەو ماوەیەدا هەموومان بەبێدەنگیی بۆ گیانی پاکی قوربانیانی ئەم تاوانە دەوەستین، هەر لێرەوە بە فەرمیی داوا لە بەڕێز ئەنجومەنی پارێزگای سلێمانی دەکەین؛ کە بە بڕیارێک ئەم ڕۆژە وەک ڕۆژی یادی تاوانی جینۆسایدکردنی ئێزدییەکان لە سنوری یاسایی ئەنجومەنی پارێزگای سلێمانیدا جێگیر بکات و ساڵانە لەم ڕۆژەدا ئەم یادە شکۆدارانە بکرێتەوە.

جینۆسایدکردنی ئێزدییەکاندا لە شەنگال و دەوروبەری لە ڕۆژی ۳ی ئابی ۲٠۱٤دا لەلایەن چەکدارانی داعشەوە ئەنجامدرا و هێزەکانی پێشمەرگە بە بیانوی نەبوونی چەکی پێویست خەڵکی ناوچەکەیان بەجیهێشت و هیچ بەرگریەکیان نەکرد، بەو هۆیەوە ژمارەیەکی زۆری ژن و کچی ئێزدی کەوتنە دەستی چەکدارانی داعسشەوە.

 

بابەتی پەیوەندیدار

Back to top button