راگەیەنراوی کۆتایی لوتکەی شامی نوێ

لڤین:

لوتکەی “شامی نوێ” کۆتایی بەکارەکانی ھێنا و لە راگەیەنراوێکیشدا میسر و ئوردن پشتیوانی خۆیان بۆ ھەوڵەکانی عێراق لەچارەسەرکردنی قەیرانەکان و ھەوڵەکانی چاکسازی و سەپاندنی دەسەڵاتی یاسا دوپاتکردوەتەوە

لەراگەیەنراوی کۆتاییهاتنی لوتکەی عێراق، ئوردن و میسرد،کە ئەمڕۆ ( یەک شەممە، ٢٧ی حوزەیرانی ٢٠٢١ ) لە بەغدای پایتەختی عێراق بەڕێوە چوو، ئاماژە بەوە دراوە،” لەکۆبونەوەکەی ئەمڕۆدا کەدرێژکراوەی دوو کۆبونەوەی دیکەی لوتکە بو، شا عەبدوڵای دوەم پادشای ئوردن و عەبدولفەتاح سیسی سەرۆک کۆماری میسر پێزانینیان هەبو بۆ هەوڵە دیپلۆماسییەکانی حکومەتی عێراق لەجێگیرکردنی ئاسایش و ئارامی ناوچەکە و هەوڵەکانی لەنزیک کردنەوەی بۆچونە جیاوازەکان بۆ تێپەڕاندنی قەیرانەکانی ناوچەکە، هەروەها پشتیوانی خۆشیان بۆ بەغدا دوپاتکردەوە لە هەوڵەکانی بۆ بەرەنگاربونەوەی تیرۆر.”

هەروەها ئەوەیش هاتووە،” قاهیرە و عەممان هەوڵەکانی حکومەتی عیراقیان بەگرنگزانی لەئەنجامدانی پرۆسەی چاکسازی و چاکسازی دارایی کەبەهۆیەوە عێراق توانی بەرەنگاری قەیرانی دارایی لەئەنجامی دابەزینی نەوت و بڵابونەوەی کۆرۆنا ببێتەوە و جارێکی دیکە پرۆسەی گەشەپێدانی دەستپێکردەوە، هەروەها پشتیوانی خۆیان بۆ ئامادەکارییەکانی حکومەت بۆ پرۆسەی هەڵبژاردنی پێشوەختی عێراق دەربڕی و هیوای سەرکەوتنی پرۆسەکەیان خواست، بەجۆرێک هاوڵاتیانی عێراق بتوانن بە شەفافیەت و ململانێیەکی دادپەروەرانە نوێنەرانی خۆیان دیاری بکەن.”

لەراگەیەنرای کۆبونەوەکەدا ئەوەش خراوەتەڕو،” عێراق و ئوردن پشتیوانی هەڵوێستەکانی میسر دەکەن لەبەرامبەر بەنداوی نەهزە و گەرەنتیکردنی پشکی قاهیرە لەئاوی روباری نیل، هەروەها لەپرسی فەڵەستیندا هەرسێ وڵات بەپێویستی دەزانن لەهەمو پرۆسەیەکی گشتگیردا رەچاو مافی بەدەوڵەتبونی فەڵەستین بەگوێرەی سنورەکانی ساڵی 1967 بکرێت و ئیسرائیلیش هەوڵەکانی بۆ دروستکردنی کۆمەڵگەی جولەکەنشین لەسەر خاکی فەڵەستین رابگرێت، هەروەها هەوڵەکانی ئوردن بەرزدەنرخێنن بۆ راگرتنی هێرشەکانی ئیسرائیل بۆسەر کەرتی غەزە و راگەیاندنی ئاگربەست لەنێوان بزوتنەوەی حەماس و حکومەتی ئیسرائیل.”