لە بارەی زۆریی کرێی کارەبا بەپێی پێوەری زیرەک ڕوونکردنەوە دەدرێت

لڤین:

ئەندامێکی لیژنەی پێوەری زیرەک، وەڵامی گلەیی هاوڵاتیان سەبارەت بە کرێی کارەبا بە پێی پێوەری زیرەک، دەداتەوە و چەند زانیارییەکیش سەبارەت بە پرۆسە بەستنی پێوەرەکە دەخاتەڕوو.

عەلی ئیسماعیل، ئەندامی لیژنەی پێوەری زیرەک، سەبارەت بە زۆریی کرێی کارەبا بەپێی پێوەری زیرەک، لە لاپەڕەی فەرمی وەزارەتی کارەبا ئەم ڕوونکردنەوانەی خستەڕوو.

–  تەنیا قەرزەکانی کەڵەکەبوو و لە پێویست زیاتر بەکارهێنانی كارەبا دەبێتە بەرزبوونەوەی نرخەکەی.

–  زۆربەی ئەو هاوڵاتیانەی دەڵێن پارەی زۆریان بۆ هاتۆتەوە، قەرزی كۆنیان لەسەرە و هەندێکیان نزیكەی ساڵێكە پارەی کارەبایان نەداوە.

–  بەدواداچوونی زۆرمان بۆ ئەو دەنگۆ و ناڕەزایەتیانە كرد كە گوایە پارەی هەندێك هاوبەش زۆر هاتووەتەوە، لەئەنجامدا دەركەوت کە پێوەرە زیرەكەكە بە دروستی پارەی كارەباكەی خوێندووەتەوە.

–  لەمانگی ڕابردوو 250 هەزار ماڵ بە پێوەری زیرەك پسووڵەی كارەبایان بۆ گەڕاوەتەوە و لەم مانگەشدا 400 هەزار ماڵ پسووڵەی كارەبایان پێ دەدرێت.

–  ئەو هاوبەشانەی سەرپێچیان لە پێوەرە كۆنەكە یان لە ڕاكێشانی كارەبا كردووە، بەپێی ئەم پێوەرە نوێیە كۆتایی بەم سەرپێچیانە هاتووە، ئەمەش دادپەروەریی لە پێدانی كارەبا بە هاوبەشان مسۆگەر دەکات.

–  ووردە ووردە پارەی موەلیدە كەم دەبێتەوە، بەهۆیەوە ئەم بارگرانییە زۆرە لەسەر شانی هاوڵاتیانیش كەم دەبێتەوە.

–  لە هەموو جیهان پرۆژەی پێوەری زیرەک بە درێژایی 7-8 ساڵ جێبه‌جێ ده‌كرێت، بەڵام ئێمە لەماوەی 1-2 ساڵ ئەم پرۆژەیە به‌ خێراییه‌كی زۆر پێوانه‌یی جێبەجێی دەکەین.