سەرۆکی حکومەت لەگەڵ پارێزگاری بانکی ناوەندی عێراق کۆبوەوە
لڤین:
مستەفا غالب موخیف پارێزگاری بانکی ناوەندی عێراق لەگەڵ سەرۆکی حکومەتی هەرێم کۆبوەوە و چەند پرسێکی گرنگیان تاوتوێکرد.
ئەمڕۆ مەسرور بارزانی سەرۆکی حکومەت پێشوازی لە مستەفا غالب موخیف پارێزگاری بانکی ناوەندی عێراق کرد و نوسینگەی سەرۆکی حکومەتی هەرێمی کوردستان بڵاویکردەوە، ، لە دیدارەکەدا گفتوگۆ دەربارەی پەرەپێدانی هەماهەنگیی و هاوکاری لە نێوان هەرێمی کوردستان و حکومەتی فیدڕاڵی کرا لە بواری ڕێکخستنەوەی کەرتی بانکی و ڕێگریکردن لە سپیکردنەوەی پارە و خراپ بەکارهێنانی پارە بۆ کاری نایاسایی و پشتیوانیکردنی تیرۆر.
لە بڵاوکراوەکەدا هاتووە کە بانکی ناوەندی، مامەڵە لە گەڵ لقی هەرێمی کوردستانی بانکی ناوەندی عێراق دەکات کە بنکەکەی لە هەولێرە، وەک لایەنی فەرمی پەیوەندیدار و تایبەت بە سەرپەرشتیکردنی کاروباری بانکی لە هەرێم.
سەرۆکی حکومەتی هەرێم وێڕای پشاندانی ئامادەیی بۆ هەر هاوکاریی و هەماهەنگییەک لەگەڵ بانکی ناوەندی عێراق، دوپاتیشی کردەوە کە ڕێکخستنەوەی سیستەمی بانکی، دەکرێت ببێتە بنەمایەکی گرنک و بەهێز بۆ پێشخستنی ژێرخانی ئابووری و پەرەپێدانی پڕۆسەی وەبەرهێنان و بەدەستهینانی متمانەی بانک و دامودەزگا داراییە نێودەوڵەتییەکان.
