قائیمقامی سلێمانی بنەماڵەی جەمال نەبەز خەڵات دەکات

لڤین:

ڕاگەیاندنی قائیم قامیەتی سلێمانی لە هەژماری فەرمێ خۆی لە تۆڕی کۆمەڵایەتی فەیس بووک، ڕایگەیاندووە،” هەوڵەکان زیاتر چڕ دەکرێنەوە بۆ پاراستنی سیمای کەلەپوری شاری سلێمانی بەتایبەت لەو گەڕەکە کۆنەکاندا و پشتگیری هەموو ئەو کەس و لایەنانە دەکرێت کە هاوکارن بۆ پاراستنی خانوو و گەڕەکە کەلەپورییەکان”.

دەقی ڕاگەیەندراوەکە:

ئەمرۆ ١٧ / ٦ / ٢٠٢١  ئاوات محەمەدـ قائیمقامی سلێمانی بە هاورێیەتی سەرۆکی لیژنە هاوبەشەکان و لیژنەی پاراستنی شوێنەوار، سەردانی خانووو ماڵی پرۆفیسۆر جەمال نەبەز)ی کرد کە ئێستا لەقۆناغی نۆژەنکردنەوەدایە و لەلایەن (نیعمەت خان) خوشکی جەمال نەبەز و بنەماڵەکەیانەوە پێشوازی لێکران.

لە وتەیەکدا قائیمقامی سلێمانی دەستخۆشی زۆری پێ گەیاندن لە بەرامبەر هەوڵ و کارەباشەکانیان بۆ پاراستنی خانووە کەلەپورییەکانیان و رێگەگرتن لە لەناوچونی ئەو سامانە نیشتیمانییە گەورەیەی شارەکەیان.

رایگەیاند؛ لەگەڵ ئەوەی نەتوانراوە تەواوی خانوو و گەڕەکە کۆنەکان وەکو خۆیان بپارێزرێن، بەڵام بە هەموومان هەموو هەوڵێک دەدەین بۆئەوەی ئەو بەشەی لە خانوو و گەڕەکە کەلەپورییەکانی سلێمانی کە ماوە بیپارێزین.

نیعمەت خان_ خوشکی پرۆفیسۆر جەمال نەبەز سەرەڕای سوپاسی زۆری بۆ قائیمقامی سلێمانی، باسی لە هەوڵ و گرنگیدانیان بە پاراستنی سیماو پێکهاتەی خانووەکانی بنەماڵەکەیان کرد و وتی: ئەم خانووە تەمەنی (۱۲٥)ساڵە و روبەرەکەی (٦٤٠) مەتر دووجایە و بەهیچ نرخێک رێگەنادەین بروخێنرێت و بە تێچوو و توانای خۆمان نۆژەنی دەکەینەوەو دەیپارێزین.

هونەرمەند دەوەن مەعروف_ سەرپەرشتیاری نۆژەنکردنەوەی خانووەکە وتی: بە راوێژ لەگەڵ ژمارەیەک هونەرمەند و ئەندازیاری تەلارساز خەریکی نۆژەنکردنەوەی خانوەکەین و دەیکەین بە ناوەندێکی کەلەپوری و مێژووی و بارەگای رێکخراوی رۆشنبیری جەمال نەبەز. ئاماژەی بەوەش کرد تەواوی سیماو پێکهاتەی خانووەکە دەپارێزین و وەکو خۆی نۆژەنی دەکەینەوە.

 

بابەتی پەیوەندیدار

Back to top button